जाजरकोटस्थित डिभिजन वन कार्यालयका प्रमुख अमरप्रसाद शाह कार्यकक्षमै कुटपिटमा परेका छन्। आइतबार दिउँसो कार्यालय समयमै अज्ञात व्यक्तिहरूले कार्यालयमा प्रवेश गरी शाहमाथि हातपात गरेका हुन्।
बिज्ञापन
प्रमुख शाहका अनुसार उनी सामान्य प्रशासनिक काममा व्यस्त रहँदा ३–४ जनाको समूहले एक्कासि कार्यकक्षमा पसेर अभद्र व्यवहार गर्दै हातपात सुरु गरेको थियो। “कसैसँग भनाभनसमेत भएको थिएन, तर उनीहरू रिसाएको स्वरमा चिच्याउँदै पसे र मलाई थिच्दै कुट्न थाले,” उनले भने।
बिज्ञापन
शाहलाई हल्का चोटपटक लागेको जनाइएको छ। घटनालगत्तै प्रहरीले अनुसन्धान सुरु गरेको छ। जिल्ला प्रहरी कार्यालय जाजरकोटका अनुसार घटना स्थल वरपर रहेका सिसिटिभी फुटेज संकलन गरिएको छ। “फुटेजको विश्लेषणपछि आक्रमणकारीहरूको पहिचान गरी कारबाही अघि बढाउनेछौं,” एक प्रहरी अधिकृतले बताए।
केही दिनअघि एक सार्वजनिक भिडियो मार्फत प्रमुख शाह मदिरा सेवन गर्दै देखिएको दाबीसहित आलोचना भएको थियो। उक्त भिडियोप्रति प्रतिक्रिया दिँदै शाहले त्यो आफ्नो चरित्र हत्या गर्न नियोजित रूपमा फैलाइएको बताए। “भिडियो कार्यालय समयभन्दा बाहिरको हो। त्यो देखाएर बदनाम गर्ने प्रयास भयो,” उनले भने, “तर त्यसका आधारमा शारीरिक आक्रमण गर्नु कानुनी र मानवीय दुबै दृष्टिले गलत हो।”
बिज्ञापन
जाजरकोट जस्तो संवेदनशील वन क्षेत्रको नेतृत्व गरिरहेका एक कर्मचारीमाथि कार्यालयभित्रै आक्रमण हुनु आफैंमा गम्भीर विषय भएको भन्दै स्थानीयले पनि छानबिन र दोषीमाथि कडा कारबाहीको माग गरेका छन्।
