भक्तपुरको बालकोटस्थित एक घरमा डेरा गरी बस्ने हुलाकका कर्मचारीका बाबुछोरा मृत भेटिएका छन्। सोमबार बिहान फिकाधारा स्थित साढे ३ तले घरमा दुई जना मृत भेटिएका हुन् । मृत फेला पर्नेमा खोटाङको रुपाकोट मझुवागढी नगरपालिका–१ घर भएका ५६ वर्षीय कुलप्रसाद आचार्य र २२ वर्षीय प्रवीण आचार्य छन् ।
बिज्ञापन
४ वर्षदेखि सो घरमा डेरामा बस्दै आएका बाबुछोरा छुट्टाछुट्टै कोठामा मृत भेटिएको जिल्ला प्रहरी परिसर भक्तपुरका डीएसपी ढुण्डीराज नेउपानेले बताए । बाहिरबाट ताला लगाएको अवस्थामा उनीहरूको शव भेटिएको हो । मृतक आचार्य जिल्ला हुलाक कार्यालय दिक्तेल खोटाङमा कार्यरत नासु पदमा कार्यरत थिए । हुलाकका निमित्त प्रमुख कुलप्रसाद केही दिनअघि मात्रै भक्तपुरस्थित डेरामा आएका थिए। उनका दुई छोरा मिलन र प्रविण भने कोठा भाडामा लिएर बालकोटमा बस्दै आएका थिए ।
बिज्ञापन
केही दिन अघि विभागमा काम पर्यो भन्दै उनी काठमाडौं आएका थिए ।
मृतक बाबुछोरा दुवैको टाउकोमा गम्भीर चोट लागेको छ । शवमा चोटपटक रहेकाले धारिलो हतियार प्रयोग गरी हत्या गरिएको प्रहरी आशंका छ । शनिबार उनीहरूसँगै सुतेका जेठा छोरा मिलन भने सम्पर्कविहीन छन् । प्रहरीले उनको खोजी सुरु गरेको छ ।
बिज्ञापन
मानव बेचविखनविरुद्ध काम गर्ने शक्ति समूहकी संस्थापक सुनिता दनुवार पनि आजै बिहान मृत भेटिएकी हुन् । उनी जोरपाटीस्थित आफ्नै निवासको बेडमा मृत फेला परेकी थिइन् ।
बिहान श्रीमानले उठाउनुअघि नै प्राण त्यागेकी दनुवारलाई नजिकैको नेपाल मेडिकल कलेज पुर्याएपछि चिकित्सकले मृत घोषणा गरेका थिए । उनको मृत्युको कारण भने खुलेको छैन ।
