सरकारले ४० जना सहसचिवको सरुवा गर्दा उद्योग विभाग, भूमि विभाग र अध्यागमन विभागको महानिर्देशक हेरफेर भएको छ । शुक्रबार बसेको मन्त्रिपरिषद् बैठकले गरेको ४० जना सहसचिवको सरुवा सूचीअनुसार उद्योग, वाणिज्य तथा आपूर्ति मन्त्रालयअन्तर्गत रहेको उद्योग विभागका महानिर्देशक यज्ञराज कोइरालाको राष्ट्रिय योजना आयोगमा सरुवा भएको छ । भूमि व्यवस्था सहकारी तथा गरिबी निवारण मन्त्रालयअन्तर्गत रहेको भूमि, व्यवस्थापन तथा अभिलेख विभागका महानिर्देशक कृष्णप्रसाद सापकोटाको पनि राष्ट्रिय योजना आयोगमै सरुवा भएको छ । त्यस्तै अध्यागमन विभागका महानिर्देशक कोषहरि निरौला सञ्चार तथा सूचना प्रविधि मन्त्रालयमा सरुवा भएका छन्।
बिज्ञापन
उक्त स्थानमा जानको लागि सहसचिवहरुको दैडधुप सुरु भएको छ । अध्यागमन विभागमा सहसचिव गोविन्द प्रसाद रिजाल एकल दाबेदार छन् । भूमि, व्यवस्थापन तथा अभिलेख विभागमा श्रवण कुमार पोखरेल, मदन कोइराला र शिव प्रसाद रेग्मीको दैडधुप रहेको छ । त्यस्तै सरकारले योजना आयोगका सहसचिव राजेश्वर ज्ञवालीलाई उद्योग वाणिज्य तथा आपूर्ति मन्त्रालयमा पठाइएको छ । हाल उद्योग मन्त्रालयमा पठाइएका ज्ञवालीलाई उद्योग विभागको महानिर्देशक बनाउने संभावना रहेको मन्त्रालय स्रोतले जानकारी दिएको छ ।
बिज्ञापन
