गाउँ-शहर जताततै दशैंको रौनक छ । छरिएर बसेका आफन्तहरु दशैंको टीका र आशिर्वाद लिन कष्ठकर यात्रा गरेर पुग्ने क्रम जारी छ ।
बिज्ञापन
कतिपय त जन्मघर पुगिसके । अर्कोतिर दशैंको मुखमा आफन्तसँग टाढिएर विदेश उड्नेहरुको पनि कमी छैन । कतिपय उडिरहेका छन् भने कति तयारीमा छन् । फूलपातीको दिन मात्रै झन्डै ७ हजार नेपाली विदेशिएका छन् । अधिकांश रोजगारीका लागि हिँडेका हुन् ।
बिज्ञापन
‘एक दिन मात्रै भए पनि बिदा थपिदिनुस् न त दशैंको टीका लगाएर प्लेन चढ्छु भनेको थिएँ, मलेसियाबाट कम्पनी साहुले बरु जागिर छाड्न सक्छौ बिदा थप्न मिल्दैन भन्यो, मेरा लागि अहिले दशैं र परिवारभन्दा जागिर प्यारो भयो’, सर्लाहीका अजय मेहताले भने ।
दशैंको अघिल्लो दिन घरबाट केही थान कपडा बोकेर वैदेशिक रोजगारीमा हिँडेका मेहताका लागि यो बाध्यता रह्यो ।
बिज्ञापन
शुक्रबार साँझपख बोर्डिङ पास लिनु अघि त्रिभुवन अन्तर्राष्ट्रिय विमानस्थल टर्मिनलको भीडमा भेटिएका मेहताका लागि दशैंको अघिल्लो दिन घर छाड्नु निकै कष्टकर भयो । सर्लाहीको घरमा हिजो गर्भवती श्रीमती चाँदनीदेवी र आमा उर्मिलादेवीले रुँदै हात हल्लाएर बिदा गरेको क्षण सम्झँदै गर्दा उनका पनि आँखा टिल्पिलाए ।
