धनुषाको महेन्द्रनगरमा रहेको नेपाल आयल निगमको डिपोमा कार्यरत एक जना कर्मचारीको हत्या भएको छ ।
बिज्ञापन
शुक्रबार बिहान १० बजे डिपोमा कार्यरत कर्मचारी सिरहा नगरपालिका ३ का ४० वर्षीय राकेशकुमार बर्मा र धनुषाको धनुषाधाम नगरपालिका ४ का ३५ वर्षीय प्रकाश यादवबीच विवादको क्रममा यादवले बेल्चाले टाउकोमा प्रहार गर्दा बर्माको घटनास्थलमै मृत्यु भएको जिल्ला प्रहरी कार्यालय धनुषाका प्रहरी प्रवक्ता एवं डीएसपी निरञ्जन अबाले जानकारी दिए । बेल्चा प्रहार गर्ने यादवलाई इलाका प्रहरी कार्यालय, महेन्द्रनगरले नियन्त्रणमा लिएको छ ।
बिज्ञापन
बर्मा र यादव दुवै आयल निगमका करारका कर्मचारी हुन् । करारमा कार्यरतहरुको सेवा सुविधा लगायतका विषयमा केही समयअघि देखि विवाद थियो । सोही विवाद हुँदा बर्मामाथि कुटपिट भएको हो । बर्मा ४ वर्षदेखि उक्त डीपोमा करारमा कार्यरत थिए ।
बर्माको शव पोस्टमार्टमका लागि जनकपुर प्रादेशिक अस्पताल पठाइएको छ ।
