उपराष्ट्रपति कार्यालयका सचिव कृष्णहरि पुष्कर हिजोबाट अनिवार्य अवकाशमा गएका छन् । सचिवको पाँच वर्षे कार्यकाल पूरा गरी सचिव पुष्कर अनिवार्य अवकाशमा गएका हुन् । ०७८ असार २४ गते सचिवमा बढुवा भएका उनी पाँच बर्ष कार्याकाल पूरा गरेर अवकाशमा गएका हुन । सचिव बढुवा भएसँगै राजस्व सचिव,अर्थ सचिव, प्रधानमन्त्री तथा मन्त्रिपरिषद्को कार्यालय, तत्कालीन सङ्घीय मामिला तथा सामान्य प्रशासन मन्त्रालय, श्रम, रोजगार तथा सामाजिक सुरक्षा मन्त्रालय तथा उपराष्ट्रपतिको कार्यालयमा सचिवबाट अवकाश पाएका हुन ।
बिज्ञापन
अघिल्लो साता सचिव चिरञ्जीवी चटौत असार १५, प्रमिलादेवी शाक्य बज्राचार्य असार १७ र मधुसुदन बुर्लाकोटी असार २१ गते अनिवार्य अवकाशमा गइसकेका छन् । यस्तै असार २६ मा मुख्य सचिव सुमनराज अर्याल र उनी अवकाशमा गएको भोलिपल्टै सचिव खगेन्द्रप्रसाद नेपाल अनिवार्य अवकाशमा जाँदैछन् । यी सचिव पनि अनिवार्य अवकाशमा गए पछि रिक्त सचिवको संख्या १४ पुग्नेछ तर सरकारले फागुन यता सचिवहरुको बढुवा गरेको छैन ।
निजामती किताबखानाको विवरण अनुसार हाल नेपाल प्रशासन सेवामा ३६ मध्ये आठ सचिवको पद रिक्त हुँदा इन्जिनियरिङ सेवाका ८ दरबन्दीमा ३ पद रिक्त छ । त्यस्तै, नेपाल वन सेवामा रहेको सचिवको एक गरी १२ सचिवको दरबन्दी रिक्त हुन पुगेको छ । यही साता थप दुई सचिव अवकाशमा जाँदा १४ सचिव पद रिक्त हुँदैछ ।
गत फागुनदेखि सचिव बढुवाको प्रक्रिया अवरुद्ध हुँदा बरिष्ठ सहसचिवहरु मारमा परेका गुनासो पोखेका छन् । बढुवाको मुखैमा आइपुग्दा सरकारको नीतिका कारण बरिष्ठ सहसचिवहरु सोही पदबाट घर फर्किनुपर्ने स्थितिमा पुगेका हुन । एकै पटक १२ सचिवको दरबन्दी रिक्त हुँदा समेत सरकारले सचिव बढुवा प्रक्रिया अगाडि नबढाउँदा बढुवाको मुखमा परेका बरिष्ठ सहसचिवहरु मारमा परिरहेका हुन ।
गत फागुनमा प्रशासनतर्फका एक,चैत्रमा प्राविधिक दुई,वैशाखमा प्राविधिक दुई सचिव अनिवार्य अवकाश लागेर घर फर्किएकामा असार महिना लागे पछि तीन जना प्राविधिक,दुई जना प्रशासनका सचिवहरु अनिवार्य अवकाशमा गएका हुन । फागुनदेखि असारमहिनाभरीमा १४ सचिवहरु अनिवार्य अवकाशमा गए पछि सचिव बढुवा प्रक्रिया अवरुद्ध छ ।
बिज्ञापन
यस अघि सचिव रामआधार साह अनिवार्य अवकाशमा गए पनि सो ठाउँमा समेत बरिष्ठ सहसचिवहरु बढुवा हुन सकेका छैनन् । विज्ञान तथा प्रविधि मन्त्रालयका सचिव रामआधार साह ५८ वर्ष पूरा भएर गत वैशाख ९ गते अनिवार्य अवकाशमा गएका थिए । यस्तै उद्योग वाणिज्य तथा आपूर्ति मन्त्रालयका सचिव रामप्रसाद घिमिरे फागुन १० गते अनिवार्य अवकाशमा गए पनि पदपूर्ति हुन सकेको छैन । यस्तै गत ९ चैत्रमा मात्र भौतिक पूर्वाधार तथा यातायात मन्त्रालयका सचिव केशव शर्मा र चैत्र १३ मा दिपक खराल अनिवार्य अवकाशमा गएसँगै सो पद पनि रिक्त रहेको छ । नेपाल सरकारले सचिव स्तरमा ७१ दरबन्दी कायम गरेको छ । त्यसमध्य हाल १२ जनाको पदपूर्ति हुन सकेको छैन । अझैं २ सचिवहरु घर जाँदैछन् । उसो त सरकारले असार महिनाभित्रैमा मन्त्रालयहरुको ओएण्डअएमको काम चल्दैछ । स्रोतहरुका अनुसार सरकारले कम्तिमा १० सचिवको दरबन्दी कटौती गर्ने भनिए पनि सात मन्त्रालय बाहेक अन्य मन्त्रालयले टुंग्याउन सकेका छैनन् । ओएण्डएम गर्दा कम्तिमा १० सचिवको दरबन्दी कटौती भएको खण्डमा बढुवाको मुखमा रहेका बरिष्ठ सहसचिवहरु थप मर्कोमा पर्नेछन् र सहसचिवबाटै घर जानुपर्ने स्थिति बन्ने देखिदैछ ।
सचिव बढुवा हुने लाइनमा बरिष्ठ सहसचिवहरु इन्दु घिमिरे, कमल प्रसाद भट्टराई,श्रीकृष्ण नेपाल,कालीप्रसाद पराजुली,नारायण प्रसाद भट्ट,उत्तर कुमार खत्री, आभा कर्ण श्रेष्ठ,चक्रवहादुर वुढा,जयनारायण आचार्य, रूद्रमान सिंह तामाङ लगायत रहेका छन् । यस्तै प्राविधिकतर्फ बुद्धिसागर लामिछाने भ्रष्टाचार मुद्धा लागेसँगै उर्जा मन्त्रालयका नवीनराज सिंह, सञ्जीव कुमार देव प्राविधिकतर्फबाट सचिव बन्ने प्रतिष्प्रर्धामा रहेका छन् ।
सचिव बढुवाका लागि लोकसेवा आयोगका अध्यक्षको अध्यक्षतामा आयोगका एक जना सदस्य, मुख्य सचिव, लोकसेवाद्वारा मनोनीत विषय विज्ञ सदस्य र सामान्य प्रशासन मन्त्रालयको सचिव सदस्यसचिव हुने सिफारिस समितिले बढुवाका लागि योग्य सहसचिवका नाम रिक्त पद संख्याभन्दा तेब्बर संख्यामा सिफारिस गर्ने व्यवस्था कानुनमा उल्लेख छ तर चार महिनादेखि सचिव बढुवा सिफारिस हुन सकेको छैन ।
बिज्ञापन
