कर्मचारी सरुवामा विगतमा जस्तै विकृतीहरु देखिएका छन् । यस्तो विकृती गृह मन्त्रालयमा देखिएको छ । यही शुक्रबार गृह मन्त्रालयले ४२ उपसचिवको सरुवा गर्दा १० वटा जिल्लाका प्रमुख जिल्ला अधिकारीहरु हेरफेर भए । सरुवाको सूची अनुसार,जुम्ला र डडेलधुरामा प्रमुख जिल्ला अधिकारी फेरिए । यी जिल्लामा सहसचिवको दरबन्दी भए पनि गृहले उपसचिवलाई त्यहाँ खटाएको हो । जबकी गृहको बरण्डामा २ सहसचिवहरु काम र जिम्मेवारी नपाएर बसिरहेका छन् । गृहसचिव राजकुमार श्रेष्ठ स्तरीय निर्णयबाट जुम्लामा उपसचिव तेजप्रकाश प्रसाईं र डडेलधुरामा उपसचिव मिना अर्याललाई प्रमुख जिल्ला अधिकारी बनाएर पठाइयो । प्रसाई झापाको सहायाक सिडियो थिए भने मिना गृहको कर्मचारी प्रशासन शाखामा कार्यरत थिइन । यसरी कर्मचारी खटाउँदा डडेलधुरामा उपसचिवको अण्डरमा उपसचिव बसेर काम गर्नुपर्ने स्थिति बनेको छ ।
डडेलधुराको सहसचिव सिडिओ विष्णुप्रसाद कोइरालाको बैशाख दोस्रो साता कोशी प्रदेशमा स्रुवा भएसँगै अमर वलीलाई सिडिओको जिम्मेवारी दिइएको थियो । मन्त्रालयले उनलाई अन्यन्त्र सरुवा नगरी गृहको कर्मचारी प्रशासन शाखाबाट मिनालाई सिडिओमा खटाउँदा एउटै जिल्लामा दुई सिडियो हुने स्थितिमात्र आएन । यस अघि सिडियो चलाइसकेका वली सोही जिल्लामा सहयाक सिडियो भएर काम गर्नुपर्ने स्थिति पैदा भएको छ ।

बिज्ञापन

अझैं रोचक त,यसरी खटन पटन गरिँदा गृह आफैले बनाएको मापदण्डलाई समेत कुल्चिएको पाइन्छ । प्रमुख जिल्ला अधिकारीहरूको पदस्थापना वा सरुवा गर्ने वा कामकाज गर्न खटाउने सम्बन्धी (दोस्रो संशोधन) कार्यविधि, २०८०’ अनुसार जुम्ला र डडेलधुरालाई सहसचिव सीडीओ भएर खटिने ‘ग’ वर्गमा राखिएको छ । उपसचिवलाई सिडियो बनाएर खटाउँदा अहिले पनि गृह मन्त्रालयमा पुष्पराज शाही र भूपेन्द्र थापा जगेडामा छन् । नायब सुब्बा, शाखा अधिकृत र उपसचिवमा पिछडिएको क्षेत्रबाट लाभ लिएका शाहीलाई सोही क्षेत्रको सिडियोको जिम्मेवारीमा पठाउन सकिन्थ्यो तर गृहले खटन पटनमा त्यसो गरेन । यस्तै यस अघि वन मन्त्रालयबाट गृहको जगेडामा पुगेका सहसचिव भुपेन्द्र थापालाई कुनै जिम्मेवारी दिन सकेको छैन । बरु उपसचिवलाई सहससिचको दरबन्दी भएको जिल्लामा खटाएको छ ।