अख्तियार दुरुपयोग अनुसन्धान आयोगले तत्कालीन जनप्रतिनिधि र तीन कर्मचारीसहित आठ विरुद्ध भ्रष्टाचार मुद्धा दायर गरेको छ ।
अख्तियारले डोटीको बडीकेदार गाउँपालिकाका तत्कालीन अध्यक्ष कृष्णबहादुर चन्द, उपाध्यक्ष इन्द्राकुमारी बोहरा, निमित्त प्रमुख प्रशासकीय अधिकृत दीपकराज जैशी र लेखापाल युवराज भट्ट,सब इन्जिनियर दान बहादुर पछेरा, भागरथी निर्माण सेवा, धनगढी ५, कैलाली तथा सोको सञ्चालक पशुपति जोशी र अख्तियार प्राप्त व्यक्ति केशव बहादुर बमसहित ८ जनालाई प्रतिवादी बनाएर विशेषमा मुद्धा दायर गरेको हो ।
आयोगका अनुसार,नदीजन्य पदार्थ उत्खननसम्बन्धी ठेक्का प्रक्रियामा अनियमितता भएको आरोपमा उनीहरुलाई प्रतिवादी बनाएको हो । २०७७/ ७८ मा ठूलीगाड र कापडीगाड क्षेत्रबाट ढुंगा, गिट्टी तथा बालुवा उत्खननसम्बन्धी ठेक्का व्यवस्थापन १४ लाख १० हजार २४० रुपैयाँ रकम राज्यकोषमा दाखिला नभएको देखिएको भेटिएसँगै उनीहरुलाई अख्तियारले प्रतिवादी बनाएर विशेषमा मुद्धा दायर गरेको हो ।
बिज्ञापन
वातावरणीय अध्ययन प्रतिवेदनले तोकेको सम्भावित उत्खनन तथा राजस्व संकलन क्षमतालाई बेवास्ता गर्दै ठेक्का रकम अस्वाभाविक रूपमा घटाइएको, प्रतिस्पर्धा सीमित हुने गरी सूचना प्रकाशन गरिएको र न्यून मूल्यमा सम्झौता गराइएको आयोगको आरोप छ।
