राष्ट्रिय कितावखानाले कर्मचारीको डिजिटल विवरण अद्यावधिक गर्ने अभियानलाई तीव्रता दिएको छ । कर्मचारी सूचना प्रणालीलाई थप व्यवस्थित, पूर्ण र विश्वसनीय बनाउने उद्देश्यसहित राष्ट्रिय कितावखानाले विभिन्न निकायसँग सेवा अन्तरआबद्धता विस्तार गर्दै गएको हो ।
बिज्ञापन
यसैक्रममा शुक्रबार राष्ट्रिय कितावखाना र ललितपुरस्थित कृषि सूचना तथा प्रशिक्षण केन्द्रबीच तालिमसम्बन्धी सेवा अन्तरआबद्धता विस्तार गर्ने समझदारीपत्रमा हस्ताक्षर भएको छ ।
बिज्ञापन
समझदारीपत्रमा राष्ट्रिय कितावखानाका महानिर्देशक श्रवणकुमार पोखरेल र कृषि सूचना तथा प्रशिक्षण केन्द्रकी प्रमुख शवनम शिवाकोटीले हस्ताक्षर गरेका हुन् । उक्त समझदारीसँगै कृषि सूचना तथा प्रशिक्षण केन्द्रले कर्मचारी सूचना प्रणाली (पीआईएस) अन्तर्गतको तालिम मोड्युल सञ्चालन तथा व्यवस्थापन गर्न सक्ने पहुँच प्राप्त गरेको छ ।
अब उक्त केन्द्रबाट तालिम लिने राष्ट्रसेवक कर्मचारीहरूको तालिमसम्बन्धी सम्पूर्ण विवरण सम्बन्धित केन्द्रले नै पीआईएस प्रणालीमा अद्यावधिक गर्नेछ । साथै तालिम प्रमाणपत्रको डिजिटल प्रतिलिपिसमेत प्रणालीमा अपलोड गरिनेछ ।
बिज्ञापन
राष्ट्रिय कितावखानाका अनुसार यस व्यवस्थाले कर्मचारी सूचना बैंकलाई स्वतः पूर्ण, शुद्ध र परिस्कृत बनाउन सहयोग पुग्नेछ । साथै तालिम प्रदायक निकायले प्रमाणपत्रको मूल प्रतिलिपि सुरक्षित राखिरहनुपर्ने झन्झटबाट मुक्ति पाउने विश्वास गरिएको छ ।
यसका साथै तालिम प्राप्त कर्मचारीले विवरण अद्यावधिक गराउन कितावखाना धाइरहनुपर्ने अवस्था अन्त्य हुने बताइएको छ । प्रमाणपत्र हराएको अवस्थामा समेत कितावखानामार्फत सजिलै प्रतिलिपि प्राप्त गर्न सकिने व्यवस्था हुने जनाइएको छ ।
राष्ट्रिय कितावखानाले सेवा अन्तरआबद्धता विस्तार गर्ने क्रममा कृषि सूचना तथा प्रशिक्षण केन्द्र ११औँ तालिम प्रदायक संस्था बनेको जनाएको छ ।
