काठमाडौँ । श्रम, रोजगार तथा सामाजिक सुरक्षा मन्त्री रामजी यादव को स्वकीय सचिवालयमा कार्यरत एक कर्मचारी अपहरण तथा अमानवीय व्यवहारसम्बन्धी गम्भीर आरोपमा पक्राउ परेका छन् । पक्राउ पर्ने व्यक्ति सचिवालयमा हलुका सवारी चालकका रूपमा कार्यरत मुस्तकिम मियाँ हुन् ।
बिज्ञापन
सप्तरीको महादेवा गाउँपालिका–१ बल्थी स्थायी घर भई हाल राजविराज–३ पाख्रेल टोल बस्दै आएका २७ वर्षीय मियाँलाई सोमबार प्रहरीले राजविराजबाट नियन्त्रणमा लिएको हो । सप्तरी प्रहरीका अनुसार उनीविरुद्ध अपहरण, शरीर बन्धक, लुटपाट तथा अमानवीय व्यवहारसम्बन्धी कसुरमा अनुसन्धान भइरहेको छ ।
प्रहरी अनुसन्धानअनुसार २०८२ फागुन १४ गते बिहान राजविराज–३ हनुमान चोकबाट राजु कुमार चौधरीलाई बन्दुक देखाएर अपहरण गरिएको थियो । दुई मोटरसाइकलमा पुगेको समूहले चौधरीलाई नियन्त्रणमा लिएर राजविराज–८ स्थित हिमालय राइस मिल पछाडिको सुनसान क्षेत्रमा पुर्याई कुटपिट गरेको आरोप छ ।
बिज्ञापन
पीडितले प्रहरीलाई दिएको जाहेरीअनुसार आरोपितहरूले आफूलाई अपमानजनक व्यवहार गर्दै भुईँमा थुकेर चाट्न बाध्य पारेका थिए । साथै मोबाइल, दुई तोला सुनको सिक्री र नगद एक लाख ३० हजार रुपैयाँ लुटेर नाङ्गै अवस्थामा छाडिएको दाबी गरिएको छ ।
घटनामा मुस्तकिम मियाँसहित चार जनाको संलग्नता देखिएको प्रहरीले जनाएको छ । अन्य तीन जना भने अझै फरार छन् । जिल्ला अदालत सप्तरीले वैशाख २४ गते नै मियाँविरुद्ध पक्राउ अनुमति जारी गरेको थियो ।
प्रहरीका अनुसार मियाँमाथि यसअघि पनि विद्युतीय अपराध र एक युवकलाई नाङ्गेझार बनाएर कुटपिट गरेको आरोपमा छुट्टै मुद्दा चलिरहेको थियो । ती दुवै प्रकरणमा उनी फरार सूचीमा रहेका बेला मन्त्रीको सचिवालयमा नियुक्त भएको तथ्य खुलेको छ ।
मियाँलाई २०८२ चैत २७ गते मन्त्री यादवको स्वकीय सचिवालयमा हलुका सवारी चालक पदमा नियुक्त गरिएको भेटिएको प्रहरीले जनाएको छ । अहिले उनको नियुक्ति प्रक्रिया र पृष्ठभूमि जाँचबारे समेत प्रश्न उठ्न थालेको छ ।
बिज्ञापन
