रसुवा, गोसाईकुण्ड गाउँपालिका–६ धुन्चेमा प्रहरीले ठूलो परिमाणमा भेप (इलेक्ट्रोनिक सिगरेट) बरामद गरेको छ। नियमित चेकजाँचका क्रममा प्रहरीले ४३६ थान भेपसहित एक जनालाई नियन्त्रणमा लिएको हो।
बिज्ञापन
जिल्ला प्रहरी कार्यालय रसुवाका अनुसार अ.प्र. पोष्ट धुन्चेबाट खटिएको प्रहरी टोलीले टिमुरेबाट काठमाडौंतर्फ जाँदै गरेको ना ६ ख ८०२७ नम्बरको कन्टेनर जाँच गर्दा उक्त भेप फेला परेको हो। कन्टेनर चालक आमाछोदिङमो गाउँपालिका–५ का ३४ वर्षीय रविन्द्र श्रेष्ठ रहेको प्रहरीले जनाएको छ।
बिज्ञापन
जाँचका क्रममा कन्टेनरको अगाडिको क्याबिन भागमा लुकाइछिपाइ राखिएको अवस्थामा “ELFBAR (30K puffs)” लेखिएको ४३६ थान भेप बरामद गरिएको हो। बरामद गरिएको भेप र सवारी साधनसहितको अनुमानित मूल्य करिब ३५ लाख ९० हजार रुपैयाँ रहेको बताइएको छ।
प्रहरीले चालक श्रेष्ठलाई नियन्त्रणमा लिई आवश्यक कारबाहीका लागि मिति २०८३/०१/२० गते रसुवा भन्सार कार्यालय टिमुरेमा बुझाएको छ। घटनाबारे थप अनुसन्धान भइरहेको जिल्ला प्रहरीले जनाएको छ।
बिज्ञापन
प्रहरी निरीक्षक रमेश रायका अनुसार भन्सार छली गरी ल्याइएका यस्ता सामग्री नियन्त्रणका लागि निगरानी कडाइ गरिएको छ।
