काठमाडौं — राष्ट्रिय सतर्कता केन्द्रले सडक विभागमा गरेको छड्के अनुगमनका क्रममा ५९ जना कर्मचारीले कार्यालय अनुशासन उल्लंघन गरेको भेटिएको छ। समयमै कार्यालय नआउने, तोकिएको ड्रेस नलगाउने तथा सामान्य प्रशासनिक अनुशासनसमेत पालना नगरेको पाइएपछि ती कर्मचारी सतर्कताको फन्दामा परेका हुन्।
बिज्ञापन
केन्द्रका अनुसार हिजो गरिएको आकस्मिक अनुगमनका क्रममा ठूलो सङ्ख्यामा कर्मचारीहरू कार्यालय समयमा उपस्थित नभएको तथा उपस्थित भएकामध्ये पनि कतिपयले निर्धारित पोशाक नलगाएको पाइएको थियो। सरकारी कार्यालयमा लागू गरिएको सेवा अनुशासन र समयपालनको मापदण्ड उल्लंघन गरेको भन्दै ५९ जनाको नामसहितको विवरण तयार गरिएको हो।
बिज्ञापन
राष्ट्रिय सतर्कता केन्द्रले उक्त कर्मचारीहरूको नामावलीसहितको प्रतिवेदन हिजै प्रधानमन्त्री तथा मन्त्रिपरिषद्को कार्यालयमा बुझाइसकेको जनाएको छ।
सरकारी कार्यालयहरूमा अनुशासन र सेवा प्रवाह सुधारका लागि राष्ट्रिय सतर्कता केन्द्रले पछिल्लो समय विभिन्न मन्त्रालय तथा विभागहरूमा आकस्मिक अनुगमन तीव्र पारेको छ। कर्मचारीहरूमा समयपालन र जिम्मेवारीप्रति सचेतना बढाउने उद्देश्यले यस्ता छड्के अनुगमन निरन्तर सञ्चालन गरिने केन्द्रको भनाइ छ।
