काठमाडौं । देशकै सबैभन्दा व्यस्त नाकामध्ये एक वीरगन्ज भन्सार कार्यालयमा पछिल्लो समय कर्मचारी र तस्करबीचको मिलेमतोमा व्यापक गडबडी बढेको आरोप लाग्न थालेको छ। विशेषगरी राजस्व अनुसन्धान विभाग खारेज भएपछि निगरानी संयन्त्र कमजोर बनेको अवसरमा सीमित तस्कर समूह र ‘सेटिङ’मा चल्ने कर्मचारीहरू सक्रिय भएको देखिएको स्रोतहरू बताउँछन्।
बिज्ञापन
भन्सार क्षेत्रमा काम गरिरहेका जानकारहरूका अनुसार राजस्व अनुसन्धान विभाग सक्रिय हुँदा भन्सार क्षेत्रमा हुने अनियमिततामाथि बाह्य निगरानी रहने गर्थ्यो। विभाग हटेपछि त्यस्तो प्रभावकारी अनुगमन नहुँदा भन्सारभित्र ‘सेटिङ’मा काम गर्ने समूहहरू झन् हौसिएको बताइन्छ।
बिज्ञापन
स्रोतका अनुसार वीरगन्ज भन्सारमा आयातकर्ताहरू, भन्सार एजेन्ट र केही कर्मचारीबीच मिलेमतोमा सामानको परिमाण कम देखाएर भन्सार पास गर्ने, बिलबिजकमा हेरफेर गर्ने तथा प्रतिबन्धित वस्तु भित्र्याउने प्रयास बढेको देखिएको छ।
हालै बिलबिजकमा उल्लेख भएको भन्दा फरक परिमाणमा सामान पास गरिएको आशंकामा एउटा ट्रक प्रहरीले नियन्त्रणमा लिएको घटना पनि सार्वजनिक भएको छ। विशेष सूचनाका आधारमा अनलोड गर्दैगर्दा नियन्त्रणमा लिइएको उक्त ट्रक भने केही समयमै छाडिएको थियो।
बिज्ञापन
यस घटनाले भन्सार क्षेत्रमा चलिरहेको मिलेमतो र प्रभावको प्रश्नलाई थप गम्भीर बनाएको छ। जानकारहरूका अनुसार प्रभावकारी निगरानी संयन्त्र नहुँदा वीरगन्ज भन्सारमा कर्मचारी–तस्कर नेटवर्क सक्रिय हुने जोखिम बढेको छ।
सरकारले सुशासन र पारदर्शिताको कुरा गरिरहेका बेला देशकै ठूलो राजस्व नाकामा देखिएको यस्तो गतिविधिले राज्यको राजस्व संकलन प्रणालीमै गम्भीर प्रश्न उठाएको छ। अहिले वीरगन्ज भन्सारमा भइरहेको गतिविधिमाथि गम्भीर छानबिन आवश्यक रहेको सरोकारवाला बताउँछन्।
