अख्तियार दुरुपयोग अनुसन्धान आयोगले ८ जनाविरुद्ध भ्रष्टाचार मुद्धा दायर गरेको छ । अख्तियारले नगरपालिकाका तत्कालीन शाखा अधिकृत,सूचना प्रविधि अधिकृत,लेखापाल,विद्यालय व्यवसथपन समितिका अध्यक्ष,प्रधानाध्यापक,विद्यालयका सहायक कर्मचारीसहित आठ जनालाई प्रतिवादी बनाएर विशेषमा मुद्धा लगेको हो ।
बिज्ञापन
आयोगले पश्चिम रुकुमको मुसिकोट नगरपालिकास्थित श्री त्रिभुवन जनता माध्यमिक विद्यालयमा भएको आर्थिक अनियमितता र भ्रष्टाचारको आरोपमा उनीहरुविरुद्ध भ्रष्टाचार मुद्धा चलाएको हो ।
बिज्ञापन
आर्थिक वर्ष २०७८–०७९ मा प्रविधिमैत्री कक्षा कोठा निर्माण तथा व्यवस्थापनका नाममा खरिद गरिएका भनिएका सामग्रीहरू विद्यालयमा आपूर्ति नै नगरी भुक्तानी लिइएको पाइएको भेटिएको, विद्यालयमा सूचना प्रविधि सम्बन्धी सामग्री खरिदपछि सञ्चालनका लागि कुनै तालिम नै नदिई झुटो बिल भरपाई बनाएर थप रकम भुक्तानी गरिएको विद्यालयको आन्तरिक आम्दानी र विद्यार्थीबाट उठाएको शुल्क रकम समेत बैंकमा दाखिला नगरेको, बेरुजु फर्छ्यौटका नाममा विना भौचर र विना उद्देश्य लाखौ रकम खाताबाट झिकी व्यक्तिगत रूपमा प्रयोग गरेको भेटिएसँगै अख्तियारले १० लाख ७५ हजार ७५३ रुपैयाँ ९८ पैसा बिगो र जरिवाना माग दाबी गर्दै विद्यालयका तत्कालीन प्रधानाध्यापक हरिप्रसाद खनाल र लेखापाल ठकबहादुर बुढाथोकीका अलवा यसैगरी, विद्यालय व्यवस्थापन समितिका तत्कालीन अध्यक्ष खेमराज खड्का, मुसिकोट नगरपालिकाका शाखा अधिकृत विनाराम खड्का र सूचना प्रविधि अधिकृत गोपाल ओली, विद्यालयका कार्यालय सहायकद्वय रमा शाह र गौरी रावत केसी र भ्रष्टाचारमा मतियारको भूमिका खेलेको भन्दै दाङको डिजिटल कम्प्युटर एन्ड इलेक्ट्रोनिक्स वर्ल्डका प्रोप्राइटर शिवप्रसाद श्रेष्ठ विरुद्ध पनि ७ लाख ८ हजार ८११ रुपैयाँ २४ पैसा बिगो कायम गरी मुद्दा दर्ता गरिएको छ।
अख्तियारले भ्रष्टाचार निवारण ऐन, २०५९ बमोजिम हदैसम्मको कारबाही र बिगो असुल उपर गर्न माग दाबी गर्दै विशेष अदालतमा आरोपपत्र पेश गरेको हो ।
