बिज्ञापन

बिज्ञापन

विमानस्थलबाट यूएई प्रस्थान गर्न लागेका नेपालीको राहदानीमा प्रस्थान छापसँगै ‘रोजगारी पूर्ण रूपमा निषेध गरिएको छ’ भन्ने व्यहोरा लेखिएको फेला परेपछि यो विवाद बाहिर आएको थियो । सोही विषयमा सत्यतथ्य पत्ता लगाउन विभागले गत वैशाख ३ गते नै छानबिन समिति गठन गरेको थियो।यस घटनामा संलग्न रहेको आशंकामा अध्यागमन अधिकृत बिमल पौडेल र टोपबहादुर खत्रीलाई त्रिभुवन अन्तर्राष्ट्रिय विमानस्थलस्थित अध्यागमन कार्यालयको जिम्मेवारीबाट हटाइएको छ। उनीहरूलाई जिम्मेवारीमुक्त गर्दै घटनाबारे आवश्यक छानबिन प्रक्रिया अघि बढाइएको विभागले जनाएको छ।

नीतिगत व्यवस्थाभन्दा बाहिर गएर काम गर्ने दुई अधिकृतलाई विमानस्थलको जिम्मेवारीबाट तत्काल हटाइएको र उनीहरूमाथि थप आवश्यक छानबिन भइरहेको विभागले जनाएको छ। अध्यागमन प्रशासनका अनुसार नेपाली नागरिकलाई शर्त राखेर विदेश पठाउने व्यवस्था कानुनमा नभएकाले यस्तो अभ्यास कसरी र किन भयो भन्ने विषयमा छानबिन समितिले विस्तृत अध्ययन गर्नेछ। छानबिनबाट प्राप्त प्रतिवेदनका आधारमा आवश्यक प्रशासनिक तथा कानुनी कारबाही गरिने बताइएको छ।

उक्त घटनापछि त्रिभुवन अन्तर्राष्ट्रिय विमानस्थलस्थित अध्यागमन कार्यालयको कार्यप्रणाली र निर्णय प्रक्रियामाथि पनि प्रश्न उठ्न थालेका छन्। छानबिन समितिले सम्बन्धित कागजात, प्रस्थान अनुमति प्रक्रिया तथा संलग्न कर्मचारीको भूमिकाबारे अध्ययन गरी प्रतिवेदन पेश गर्ने तयारी गरिरहेको छ।