काठमाडौँ । रसुवाको रसुवागढी नाकाबाट अवैध रूपमा ल्याइँदै गरेको ठूलो परिमाणको चाँदीसहित एक चिनियाँ नागरिक पक्राउ परेका छन्।
बिज्ञापन
जिल्ला प्रहरी कार्यालय धुन्चे, रसुवाका अनुसार मिति २०८२ चैत १७ गते दिउँसो करिब १ बजे गोसाईकुण्ड गाउँपालिका–२ स्थित नेपाल–चीन सीमा नाका रसुवागढीमा संयुक्त जाँचका क्रममा चिनियाँ नागरिक पक्राउ परेका हुन्।
बिज्ञापन
इलाका प्रहरी कार्यालय टिमुरेबाट खटिएको प्रहरी टोली र सशस्त्र प्रहरी बलको बोर्डर आउटपोस्ट (बीओपी) टिमुरेबाट खटिएको संयुक्त चेकिङ टोलीले चीनबाट पैदल नेपालतर्फ आउँदै गरेका राहदानी नम्बर EP1211946 भएका चिनियाँ नागरिक ह्वाङ बिनछेङलाई शंकास्पद अवस्थामा जाँच गरेको थियो।
प्रहरीले उनको साथमा रहेको सुटकेस जाँच गर्दा भित्र लुकाइछिपाइ ल्याइएको पहेँलो र सेतो धातुका चार थान सामग्री फेला पारेको थियो। बरामद सामग्रीमा A83257 लेखिएको पहेँलो धातु एक थान, AU9999 100g लेखिएको पहेँलो धातु एक थान तथा चिनियाँ अक्षर लेखिएका चाँदी जस्तो देखिने सेतो धातु दुई थान रहेका थिए।
बिज्ञापन
बरामद धातुको गुणस्तर परीक्षण नेपाल बैंक लिमिटेड शाखा कार्यालय धुन्चेमा गराउँदा पहेँलो धातुका दुई थान र सेतो धातुका दुई थान सबै चाँदी भएको पुष्टि भएको प्रहरीले जनाएको छ।
बरामद चाँदीको कुल तौल १६७३.३२० ग्राम रहेको छ भने यसको अनुमानित मूल्य ६ लाख ९५ हजार ९७ रुपैयाँ १३ पैसा रहेको बताइएको छ।
प्रहरीले उक्त चाँदीसहित चिनियाँ नागरिक ह्वाङ बिनछेङलाई नियन्त्रणमा लिएर थप अनुसन्धान तथा आवश्यक कारबाहीका लागि मिति २०८२ चैत १८ गते रसुवा भन्सार कार्यालय टिमुरेमा बुझाएको जनाएको छ।
