रुकुमपश्चिमको चौरजहारी नगरपालिकाका नगर प्रमुख पुष्प वादी र असिस्टेन्ट सब–इन्जिनियर मोहन शाहविरुद्ध भ्रष्टाचार मुद्दा दायर भएको छ ।
बिज्ञापन
सबइन्जिनियरको करार सेवा थप गर्न एक लाख घुस लिएको आरोपमा रुकुम पश्चिमको चौरजहारी नगरपालिकाका प्रमुख पुष्प वादीविरुद्ध भ्रष्टाचार मुद्दा दायर गरिएको अख्तियारले जनाएको छ । मेयर वादीले नगरपालिकाका असिस्टेन्ट सबइन्जिनियर मोहन शाहसँग करार अवधि थपिदिन एक लाख घुस लिएको अख्तियारको दाबी छ । उनले दोस्रो पटक करार अवधि थप्नका लागि पनि पुनः एक लाख घुस मागेको, तर शाहले नदिएपछि बर्खास्त गरिएको आरोप पत्रमा उल्लेख छ ।
बिज्ञापन
उनले बैंक खातामै सहायक सबइन्जिनियर मोहन शाहसँग घुस लिएको अख्तियारको छानबिनबाट पृष्टि भएको छ । नगर प्रमुख वादीले आर्थिक वर्ष २०७९/ ०८० मा करार म्याद थप गरिदिने सर्तमा मोहन शाहसँग १ लाख घुस लिएका थिए। शाहले २०८० साउन ८ गते वादीको बैंक खातामा उक्त रकम जम्मा गरेको प्रमाणसमेत पेश भएको जनाइएको छ। आयोगका अनुसार घुस रकम दिएपछि शाहको असिस्टेन्ट सब–इन्जिनियर पदमा करार म्याद थप गरिएको थियो। तर पुनः आर्थिक वर्ष २०८२/०८३ का लागि नवीकरण गर्न थप रकम मागिएको र उपलब्ध गराउन नसकेपछि शाहलाई सेवाबाट हटाइएको उजुरीमा उल्लेख छ।
अनुसन्धानबाट नगर प्रमुख वादीले आफ्नो पदको दुरुपयोग गर्दै सेवामा निरन्तरता दिलाइदिने नाममा घुस लिएको पुष्टि भएको आयोगको दाबी छ। उनीमाथि भ्रष्टाचार निवारण ऐन, २०५९ को दफा ३ अन्तर्गतको कसुर लगाइएको छ । उक्त कसुरमा बिगो १ लाख कायम गरी कैद, जरिवाना र घुस रकम जफतको माग गरिएको छ। साथै सार्वजनिक पदमा रहेका कारण थप सजायको माग पनि गरिएको छ।
बिज्ञापन
वादी तत्कालीन माओवादी केन्द्रबाट मेयरमा विजयी भएका हुन्।मेयर वादीले भने आफूले घुस नलिएको बताएका छन् । पोखराको एक कार्यक्रममा जाँदा एक लाख सापटी मागिएको र उक्त रकम त्यतिबेलै फिर्ता गरिएको भए पनि अहिले अदालतमा मुद्दा दर्ता हुनु आश्चर्यजनक रहेको उनको भनाई छ ।
