विशेष अदालतले भ्रष्टाचार मुद्धामा शाखा अधिकृत,लेखापाल,लेखासहायकसहित सात जना कर्मचारीलाई सफाइ दिएको छ । अदालतले कपिलवस्तुको मायादेवी गाउँपालिकाका चार जना तत्कालीन प्रमुख प्रशासकीय अधिकृत,एक लेखा अधिकृत,एक लेखापाल र अर्का एक लेखा सहायक गरी भ्रष्टाचार मुद्धा खेपिरहेका सात कर्मचारीलाई सफाइ दिएको हो ।

बिज्ञापन

अख्तियार दुरुपयोग अनुसन्धान आयोगले कपिलवस्तुको मायादेवी गाउँपालिकाका तत्कालीन प्रमुख प्रशासकीय अधिकृत र लेखाका कर्मचारीसहित ७ जना विरुद्ध स्वास्थ्य सम्बन्धी विभिन्न कार्यक्रम सञ्चालन गर्न भनी लिएको पेश्की रकम काम सम्पन्न नगरी र बिल भरपाई पेस नगरी हिनामिना भन्दै विशेषमा मुद्धा लगेकोमा सातै जनाले सफाइ पाएका हुन । अख्तियारका अनुसार आर्थिक वर्ष २०७५/ ७६ देखि २०७८/ ७९ सम्म पटक–पटक लिएको पेस्कीमध्ये ४६ लाख ७ हजार तीन सय रकम बराबरको बिल भरपाई पेस नगरी र सो रकम फिर्ता नगरी सरकारी सम्पत्ति हिनामिना गरेको अभियोग थियो । पुरानो पेश्की फर्छ्यौट नभएको अवस्थामा पनि नियम विपरीत थप पेश्की दिने र आपसी मिलेमतोमा सरकारी रकम हिनामिना गर्न सहयोग गरेको आरोपमा आयोगले तत्कालीन प्रमुख प्रशासकीय अधिकृतका साथै लेखा अधिकृत,लेखापाल र लेखासहायकलाई प्रतिवादी बनाएर मुद्धा दायर गरेको थियो ।
सोही मुद्धामा सोमबार विशेष अदालतका न्यायाधीशद्वय नारायणप्रसाद पौडेल र विदुर कोइरालाको इजलासले सातै जना कर्मचारीहरुलाई सफाइ दिएको हो ।