काठमाडौं । अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले राज्य सञ्चालनका विभिन्न तहमा बिचौलियाको प्रभाव बढ्दै गएको भन्दै त्यसको अन्त्य नगरे सुशासन केवल नारामै सीमित हुने चेतावनी दिएका छन्।
बिज्ञापन
उनले बजेट निर्माण, योजना छनोट, महत्वपूर्ण निकायका नियुक्ति, मन्त्री नियुक्तिदेखि सरुवा र बढुवासम्मका प्रक्रियामा शक्तिशाली बिचौलियाहरूको हस्तक्षेप बढ्दो रहेको बताए। राईका अनुसार सरकार परिवर्तनसम्मका गतिविधिमा समेत बिचौलियाहरूको प्रभाव देखिन थालेको छ, जसले राज्य संयन्त्रलाई कमजोर बनाइरहेको छ।
“राज्य सञ्चालकहरूले सबै क्षेत्रमा बिचौलिया निशेष गर्न नसके सुशासन सम्भव हुँदैन,” उनले भने, “यिनै बिचौलियाहरूले सरकार र त्यसअन्तर्गतका निकायहरूलाई आफ्नो नियन्त्रणमा लिँदै इशारामा चलाउन थालेका छन्।”
बिज्ञापन
प्रमुख आयुक्त राईले बिचौलिया संस्कृतिले नीति निर्माणदेखि कार्यान्वयनसम्म विकृति भित्र्याएको उल्लेख गर्दै पारदर्शिता, उत्तरदायित्व र विधिको शासन सुदृढ नगरे अवस्था झन् जटिल बन्ने बताए।
उनले सबै राजनीतिक दल, सरकारी निकाय तथा सरोकारवाला पक्षलाई बिचौलिया प्रभावविरुद्ध एकजुट हुन आग्रह गर्दै राज्यलाई सुशासनतर्फ अघि बढाउन कडाइका साथ सुधारात्मक कदम चाल्नुपर्नेमा जोड दिए।राईले समयमै सुधार नगरे राज्य नै धराशायी अवस्थातर्फ जान सक्ने चेतावनीसमेत दिएका छन्।
बिज्ञापन
