राष्ट्रिय सतर्कता केन्द्रले राष्ट्रिय प्रकृति संरक्षण कोषका सदस्य सचिव शरदचन्द्र अधिकारीको नियुक्ति गैरकानुनी भएको ठहर गरेसँगै उनी सुटुक्क राजीनामा बुझाएर हिडेका छन् । अधिकारीले सोमबार नै राजीनामा बुझाएर सुटुक्क त्यहाँबाट बाहिरिएको कोष स्रोतले जनाएको छ । शक्तिबहादुर बस्नेत वन तथा वातावरणमन्त्री भएका बेला ३ पुस २०७७ मा ५ वर्षका लागि अधिकारीलाई कोषमा नियुक्त भएका थिए । उनी कार्यकाल सकिन एक बर्ष बाँकी छँदै राजीनामा बुझाएर सुटुक्क बाहिरिएका हुन ।
बिज्ञापन
उनको नियुक्ति गैरकानुनी रहेको जनाउँदै २०७८ मा अख्तियार दुरुपयोगमा उजुरी परेको थियो । अख्तियारले उक्त उजुरीउपर छानबिनको सम्बन्धमा वन तथा वातावरण मन्त्रालयसँग पटक पटक पत्राचार गरेको थियो । तर,आयोगको छानबिन फितलो भएकाले अधिकारीले बेरोकटोक काम गर्दै आए । अयोग्य व्यक्तिको नियुक्तिपछि यसबीच भएका कतिपय आर्थिक र नीतिगत निर्णयमा गम्भीर चलखेल गरिएको कोषका कर्मचारीहरु बताउँछन् ।
बिज्ञापन
उनको शैक्षिक योग्यता र नियुक्तिलाई लिएर राष्ट्रिय सतर्कता केन्द्रमा पनि उजुरी परेको थियो । केन्द्रले उनको नियुक्ति विधिसम्मत नदेखिएको भन्दै आवश्यक कारबाहीका लागि कोषका अध्यक्ष कृष्णप्रसाद ओलीलाई निर्देशन दियो । २२ फागुनमा केन्द्रका सचिव रामआधार साहले अधिकारीको नियुक्ति नियुक्ति विधिसम्मत नदेखिएको भन्दै आवश्यक कारबाही गर्न कोषका अध्यक्ष कृष्णप्रसाद ओलीलाई निर्देशन दिने निर्णय गरेका छन् ।
भ्रष्टाचार निवारण ऐन, २०५९ को दफा ३८ (छ)ले दिएको अधिकार बमोजिम सतर्कता केन्द्रले यस्तो पत्र पठाएको हो । मनोनयनको प्रक्रिया नपुगेको र नियुक्ति गर्दा पालना गर्नुपर्ने कार्यविधि पनि पालना नभएको सतर्कताको ठहर छ । पत्रअनुसार अधिकारी अब पदमुक्त हुने छन् ।
बिज्ञापन
सतर्कता केन्द्रले अनुसन्धानमा नेपाल सरकार मन्त्रिपरिषद्बाट स्वीकृत भएको वन तथा भू संरक्षण मन्त्रालय सम्बद्ध सार्वजनिक निकायका पदाधिकारी तथा सदस्यको नियुक्ति र मनोनयन सम्बन्धी मापदण्ड, २०७३ अनुसार अधिकारी नियुक्त नभएको ठहर गरेको छ । सो मापदण्डले तोकेको शैक्षिक योग्यता अधिकारीसँग नभएको र मापदण्ड अनुसार पूरा गर्नुर्पो मनोनयनको प्रक्रिया पूरा नभएको सतर्कताको ठहर गरेको थियो ।
यस्तै वन तथा वातावरण मन्त्रालय सम्बद्ध सार्वजनिक निकायका पदाधिकारी, कार्यकारी प्रमुख तथा सदस्यको नियुक्ति र मनोनयनका लागि छनोट गर्दा अपनाउनुपर्ने कार्यविधि, २०७५ अनुसार पालना गर्नुपर्ने व्यवस्थाहरु समेत मिचिएको सतर्कताले जनाएको छ ।
मन्त्रालयको मापदण्डअनुसार कम्तीमा वन विज्ञान, विज्ञान वा प्राकृतिक स्रोत व्यवस्थापन विषयमा स्नातकोत्तर तह अध्ययन सकेर सम्बन्धित क्षेत्रमा न्युनतम् ५ वर्षको अनुभव भएको हुनुपर्ने उल्लेख छ । तर, अधिकारीले नियुक्ति पाएको समयमा मानविकी संकायमा पत्रकारिता तथा आमसञ्चार विषयमा स्नातकोत्तर उत्तीर्ण गरेको भटिएको सतर्ककता केन्द्रका अनुसन्धान अधिकारी बताउँछन् । सदस्य सचिव अधिकारीले कोषमा कार्यक्तम व्यवस्थापन र र जनसम्पर्क अधिकृतका रूपमा गरी काम गरेपनि ५ वर्षको योग्यता नपुगेको ठहर सतर्कताको छ ।
त्यसकै आधारमा सतर्कताले अवैध नियुक्ति लिएको देखिएको भन्दै मनोनयन खारेज गर्न केन्द्रको निर्देशन पछि उनी राजीनामा दिएर बाहिरिएका हुन ।
