चालु आर्थिक वर्ष २०८०/८१ को ९ महिनाको अवधिमा २८६ वटा उद्योग दर्ता भएका छन् ।
बिज्ञापन
उद्योग विभागका अनुसार साउन–चैतसम्म सो संख्यामा उद्योग दर्ता भएको तथ्यांकमा देखिएको छ ।चैतमा मात्रै १० अर्ब ५९ करोड रुपैयाँ लगानीका २८ उद्योग दर्ता भएका छन् ।
बिज्ञापन
उद्योग विभागमा दर्ता भएका दुई सय ८६ उद्योगमध्ये ३६ ठूला, २७ मझौला र दुई सय २३ साना उद्योग रहेका छन् । विभागका अनुसार यी उद्योगहरूले २० हजार एक सय ३७ लाई रोजगारी दिने प्रस्ताव गरेका छन् । यो वर्ष उद्योग विभागले स्वदेशी तथा विदेशी लगानीका तीन सय ६५ उद्योग दर्ता हुने अनुमान गरेको छ ।
चैतसम्म विदेशी लगानीका २६९ उद्योग दर्ता भएका छन् । १६ वटा चैतमा दर्ता भएको विभागको तथ्यांक छ । यस अवधिमा ३० अर्ब १० करोड विदेशी लगानी प्रस्तावित भएको छ । चैत महिनामा मात्र आएका उद्योगले १ अर्ब रुपैयाँ लगानीको प्रस्ताव गरेको विभागले जनाएको छ।
बिज्ञापन
साना उद्योग दर्तामा वार्षिक लक्ष्य पूरा
यो वर्ष उद्योग विभागले २०० वटा साना उद्योग दर्ता गर्ने लक्ष्य लिएको थियो । चालु आर्थिक वर्षको पहिलो ९ महिनामा मात्रै वार्षिक लक्ष्यभन्दा ११ प्रतिशत बढी उद्योग दर्ता भएको विभागका प्रवक्ता अर्जुन सेन ओलीको भनाइ छ ।
मझौला र साना उद्योगको हकमा भने लक्ष्यभन्दा निकै कम संख्यामा मात्रै उद्योग दर्ता हुन सकेका छन् । यो वर्ष ८५ वटा मझौला र ८० वटा साना उद्योग दर्ता गर्ने लक्ष्य रहेकोमा क्रमशः ३१.७६ प्रतिशत र ४५ प्रतिशत लक्ष्य पूरा भएको छ ।
विदेशी लगानी प्रतिवद्धतामा भने सरकार लक्ष्यलाई भेट्ने अवस्था देखिएको छ । सरकारले यो वर्ष ३८ अर्ब विदेशी लगानी प्रतिवद्धताको लक्ष्य लिएकोमा चालु आर्थिक वर्षको पहिलो ९ महिनासम्म ७९.२१ प्रतिशत लक्ष्य हासिल भएको छ ।
