विगतका परम्परागत एक पछि अर्काे अभ्यासहरु क्रमभंग गर्दै आएको वर्तमान सरकारले गत शुक्रवार यस्तै अर्काे क्रमभंगता गरेको छ,जस्को चर्चा र परिचर्चामा अहिले प्रशासनिक वृत्तमा । नेपाल सरकारका मुख्य सचिव सुमनराज अर्यालको बिदाइ प्रधानमन्त्री वालेन्द्र शाहका राजनीतिक सल्लाहकार असिम शाहले गरेपछि अनेकन कोणकाट टिका टिप्पणी र चर्चा तथा परिचर्चा शुरु भएको छ । विगतका अभ्यास र क्रमभंगता गर्ने नाममा सरकारले निजामती प्रशासनको हुर्मत लिन खोजेको रुपमा टिप्पणी गर्नेहरु प्रशष्त भेटिएका छन् निजामती भित्र । झण्डै तीन दशक समय निजामतीमा बिताएर ८ महिना अवधिमध्ये चार महिना वर्तमान सरकारसँग काम गरेका मुख्य सचिव सुमनराज अर्यालको अवकाश उति सुखद हुन नपुगेको टिप्पणी गर्नेहरु धेरै भेटिएका छन् । मुख्यसचिव सुमनराज अर्याल गत शुक्रबारदेखि औपचारिक अवकाशमा गए । उनको अवकाश अघि नै सरकारले बरिरयताको ३६ औं नम्बरमा रहेका गोविन्द कार्कीलाई नियुक्त गरेको छ ।एकातिर बरियतामा निकै तल रहेका कार्कीलाई मुख्य सचिवमा नियुक्ति गरिनु र अर्काेतिर वर्तमान मुख्य सचिवलाई प्रधानमन्त्री तथा मन्त्रीहरुले बिदाइ गर्नुपर्नेमा प्रधानमन्त्रीको सल्लाहकारले बिदाइ गर्नुको पछाडि गहिरो अर्थ रहेको पूर्व प्रशासकरु टिप्पणी गर्दछन् ।

बिज्ञापन

नयाँ मुख्य सचिव कार्कीले नियुक्ति पाउनु अगावै  सिंहदरबारमा आयोजित एक कार्यक्रममा निवर्तमान मुख्यसचिव अर्यालको  बिदाइ कार्यक्रम आयोजना गरिएको थियो । विगतमा सरकारका मुख्य सचिवलाई प्रधानमन्त्रीको उपस्थितीमा बिदाइ गर्ने परम्परा रहँदै आएको थियो । जस्तो सुमन अर्याल अघिका मुख्यसचिव एकनारायण अर्याल प्रधानमन्त्रीबाट बिदाइ भएका थिए । यस्तै उनी अघिका मुख्यसचिव लीलादेवी गड्तौलादेखि शंकरदास बैरागी, लोकदर्शन रेग्मी, राजेन्द्रकिशोर क्षेत्री लगायतका अधिकांश मुख्य सचिवहरुलाई प्रधानमन्त्रीले नै बिदाइ गरेका थिए । तर यस पटक मुख्य सचिवको बिदाइमा प्रधानमन्त्रीका राजनीतिक सल्लाहकार मात्र उपस्थित रहे ।