असार महिना लागेपछि पाँच जना सहसचिवसहित १४६ जना कर्मचारीले राजीनामा दिएका छन् । निजामती किताबखानाको रेकर्ड अनुसार असार लागे ५ सहसचिव,३३ उपसचिव,२९ शाखा अधिकृत,सहायकस्तरका ७९ जना गरी १४६ कर्मचारीले राजीनामा दिएका हुन ।

बिज्ञापन

राष्ट्रिय किताबखाना (निजामती) का अनुसार यो सङ्ख्या यो अवधिमा अनिवार्य अवकाशमा जानेभन्दा बढी हो ।रेकर्ड अनुसार,असार १ गते २, २ गते ५, ३ गते १०, ४ गते १२, ५ गते १२ जना कर्मचारीहरुले राजीनामा दिएका छन् । ६ र ७ गते सार्वजनिक बिदा भएका कारण राजीनामा दिने कर्मचारीहरु भएनन् । ८ गते ११ जना, ९ गते ६ जना, १० गते २ जना र ११ गते ११ जनाले राजीनामा दिएका छन् । यसरी राजीनामा दिनेमा सहसचिव तहका ६ कर्मचारी हुन । वन मन्त्रालयमा कार्यरत सहसचिव राजु सापकोटा र वन विभागका उपमहानिर्देशक उद्धव घिमिरेले समेत राजीनामा दिएका छन् । उता पूर्वाधार मन्त्रालय मातहतकै सहसचिव प्रभात झाले राजीनामा दिएका छन् । उनले आगामी १३ असारदेखि लागू हुने गरि राजीनामा दिएका हुन । पूर्वाधार विकास मन्त्रालयका अनुसार,प्राविधिक सहसचिव प्रभातकुमार झा अझैं १५ वर्ष जागिर बाँकी छदै पेन्सन पकाएर राजीनामा दिएर हिँडेका छन्।
यस्तै उपसचिवहरू भोजबहादुर एडी, श्रीधर पन्थी, शोभाकर पाण्डे, मेघनाथ सापकोटा, लालप्रसाद शर्मा भुसाल, शोभाकर न्यौपाने, सुमा श्रेष्ठ र कृष्ण बेन्जुले राजीनामा दिएकामध्ये अधिकांशको राजीनामा स्वीकृत भइसकेको छ । यस्तै शाखा अधिकृत विणा श्रेष्ठ, शाखा अधिकृत शेखरनिधि पौडेल, शाखा अधिकृत दिलसेर राई, शाखा अधिकृत मार्किस दोरंगाले पनि राजीनामा दिएका छन्। यस अघि नै स्थानीय तहमा खटाइएसँगै शाखा अधिकृतद्धय गणेश घिमिरे, हरि पौडेललगायतले राजीनामा दिएका थिए । यसअघि सुगमबाट दुर्गममा सरुवा हुँदा निजामती कर्मचारीका ट्रेड युनियन लगाएर सरुवा बदर गराउने वा काज मिलाएर काठमाडौँ लगायतका सुगममा बस्ने प्रबन्ध कर्मचारीहरूले मिलाउँथे । अहिले सरकारले अध्यादेशमार्फत निजामती कर्मचारीका ट्रेड युनियन पनि खारेज गरेको छ । सो सँगै कर्मचारीहरु राजीनामा दिएर हिँड्न लागेका हुन् । नयाँ सरकार बनेको तीन महिनामै ५ सय ८४ जना कर्मचारीको राजीनामा स्वीकृत भएको किताबखानाको रेकर्डमा देखिन्छ ।