कम्पनी रजिष्ट्रार कार्यालयका २० कर्मचारी कटौतीको प्रस्ताव उद्योग मन्त्रालयमा पुगेको छ । हाल कार्यालयमा ७० कर्मचारीको दरबन्दी रहेकोमा करिब २९ प्रतिशत अर्थात २० कमर्मचारी कटौतीको प्रस्ताव उद्योगमा पठाइएको हो । मन्त्रालयका सचिवसहितको उच्चस्तरीय टोली लिएर मन्त्री गौरीकुमारी यादव आज कार्यालयको वस्तुस्थिति बुझ्न त्यहाँ पुगेकी थिइन । त्यसक्रममा २९ प्रतिशत कर्मचारी कटौतीको प्रस्ताव गरिएको बिषय मन्त्री यादवलाई जानकारी गराइएको हो ।

बिज्ञापन

कार्यालयको बस्तु स्थिति बुझ्न सचिव कृष्ण राउतसहित त्रिपुरेश्वर पुगेकी मन्त्री यादवलाई कम्पनी रजिष्ट्रारको प्रमुख कृष्ण कुमारी कार्कीले प्रगति विवरण सुनाएकी थिइन । सो क्रममा रजिष्ट्रार श्रेष्ठले टोलीलाई कार्यालयका विभिन्न कार्यकक्ष तथा डिजिटल प्रणालीबारे जानकारी गराएकी हुन ।
कम्पनी रजिष्ट्रारले डिजिटल प्रणाली र प्रविधिलाई पूर्ण रूपमा लागू गरेसँगै जनशक्ति व्यवस्थापनमा ठूलो फेरबदल ल्याउने गरी प्रस्ताव अगाडि बढाइएको हो । हाल कम्पनी दर्ताका लागि सेवाग्राही कार्यालय धाउनुपर्ने बाध्यता हटेको छ । घरबाटै अनलाइनमार्फत सम्पूर्ण प्रक्रिया पूरा गर्न सक्ने प्रणाली विकसित गरिएको छ। यसका साथै, कम्पनी दर्तापश्चात् स्थायी लेखा नम्बर लिनका लागि सम्बन्धित आन्तरिक राजस्व कार्यालय गइरहनु नपर्ने गरी प्रविधिलाई एकीकृत गरिएको छ ।