डिजिटल प्रविधिको प्रयोगमार्फत आफ्नो परम्परागत सेवा प्रवाहलाई रूपान्तरण गर्न सफल निकायको पहिचान बनाएको राष्ट्रिय किताबखानाले ‘घरबाटै काम, हत्केलामै सेवा’ भन्ने सेवा प्रवाह मोडेल सुरु गरेको छ ।
बिज्ञापन
सम्पत्ति छानबिन आयोग–२०८३ को सूचनाअनुसार एक महिनाभित्र सम्पत्ति विवरण बुझाउनुपर्ने दायित्व भएका उपसचिवस्तर वा सोभन्दा माथिका बहालवाला तथा निवृत्त कर्मचारीलाई लक्षित गर्दै किताबखानाले यो सेवा मोडेल सञ्चालनमा ल्याएको हो ।
बिज्ञापन
आयोगमा सम्पत्ति विवरण बुझाउने समय सीमित रहेको र बीचमा सार्वजनिक बिदासमेत परेकाले देश तथा विदेशमा रहेका लक्षित कर्मचारीले सहज रूपमा सेवा लिन सकून् भन्ने उद्देश्यले यो सेवा प्याकेज सार्वजनिक गरिएको महानिर्देशक श्रवणकुमार पोखरेलले जानकारी दिए ।
उनका अनुसार यो सुधार प्याकेज सरकारको ‘१०० कार्यसूची’ अन्तर्गत दोस्रो बुँदामा उल्लेख गरिएको ‘सेवा आधारित सुशासन’ को मर्मअनुसार अघि बढाइएको हो ।
बिज्ञापन
‘घरबाटै काम, हत्केलामै सेवा’ मोडेलअन्तर्गत तोकिएका कर्मचारीले बिदाका दिनसमेत घरमै बसेर ल्यापटप र इन्टरनेटमार्फत डिजिटल सेवा व्यवस्थापन गर्नेछन् । यस्तै, सेवाग्राहीले पनि आफ्नै स्मार्ट मोबाइलमार्फत सेवा प्राप्त गर्ने व्यवस्था गरिएको छ ।
राष्ट्रिय किताबखानाले आज २०८३ जेठ १४ गतेदेखि लगातार चार दिन सार्वजनिक बिदा परेको अवधिमा समेत यो सेवा सञ्चालन गरिएको जनाएको छ ।
घरबाटै इमेल, ह्वाट्सएपलगायत डिजिटल माध्यमको प्रयोग गरी ‘तलबी आम्दानीको निस्सा’ बहालवाला वा निवृत्त कर्मचारीको स्मार्ट मोबाइलमै पुर्याउने व्यवस्था गरिएको छ । यस सेवा मोडेलमा पाँच जना कर्मचारी स्वस्फूर्त रूपमा सहभागी भएको विभागले जनाएको छ ।
राष्ट्रिय किताबखानाले यसअघि नै आफ्ना सम्पूर्ण सेवाहरूलाई ‘फेसलेस सेवा प्रणाली’ मा रूपान्तरण गरिसकेको छ । डिजिटल प्रविधिको अधिकतम प्रयोगमार्फत सेवा प्रवाहलाई सहज, छरितो र सेवाग्राहीमैत्री बनाउने अभियानलाई विभागले निरन्तरता दिएको जनाएको छ ।
