अख्तियार दुरुपयोग अनुसन्धान आयोगले पाँच लाख घुससहित रंगेहात पक्राउ परेका नासुविरुद्ध भ्रष्टाचार मुद्धा दायर गरेको छ । अख्तियारले मालपोत कार्यालय भैरहवा, रुपन्देहीका नायब सुब्बा ओमबहादुर खाम्चाविरुद्ध आज विशेष अदालतमा मुद्धा लगेको हो । खाम्चालाई गत वैशाख चार गते अख्तियार दुरुपयोग अनुसन्धान आयोगको टोलीले सेवाग्राहीबाट घूसबापत लिइरहेको अबस्थामा रंगेहात पक्राउ गरेको थियो । उनको साथबाट २ लाख र स्रोत नखुलेको थप साढे ३ लाख गरी साढे ५ लाख नगदसहित नियन्त्रणमा लिएको थियो । अख्तियारले पक्राउ गरेको महिना दिन पछि विशेषमा मुद्धा लगेको हो ।

बिज्ञापन

जग्गाको नयाँ श्रेस्ता कायम तथा नामसारी गर्ने क्रममा सेवाग्राहीसँग उनले घूस मागेको भेटिएपछि अख्तियारलाई सूचना पुगेको थियो । त्यसकै आधारमा खटिएको टोलीले रुपन्देहीको सिद्धार्थनगर नगरपालिका १३ बाट नियन्त्रण लिएको हो । अनुसन्धानको क्रममा उनले जीर्ण स्रेस्ता कायम गरी अपुताली जग्गा नामसारी दाखासमेतका काम गरिदिएबापत सेवाग्राहीसँग घुस बुझेको अनुसन्धानबाट खुलेको अख्तियारका अधिकारीहरुले जनाएकाछन् ।