काठमाडौं । व्यवसायी विष्णु कुमार अग्रवाल विरुद्ध नक्कली मूल्य अभिवृद्धि कर (भ्याट) बिल प्रयोग गरी कर छली तथा भन्सार छलिमा संलग्न रहेको आरोपसहित प्रधानमन्त्री तथा मन्त्रिपरिषद्को कार्यालयमा उजुरी दर्ता भएको छ ।
बिज्ञापन
२०८३ वैशाख २५ गते दर्ता गरिएको निवेदनमा अग्रवाल र उनी सम्बद्ध विभिन्न कम्पनीहरूको आर्थिक कारोबारमाथि विस्तृत छानबिन गरी दोषी देखिए कानुनबमोजिम कारबाही गर्न माग गरिएको छ ।
बिज्ञापन
उजुरीमा काठमाडौंको त्रिपुरेश्वरस्थित मोरङ अटो वर्क्स का सञ्चालक अग्रवालले विदेशबाट अटोमोबाइल तथा सवारी साधन आयात गरी नेपालमा बिक्री वितरण गर्दै आएको उल्लेख गरिएको छ । सोही कारोबारका क्रममा नक्कली भ्याट बिल प्रयोग गरेर राज्यलाई बुझाउनुपर्ने करोडौं रुपैयाँ कर छलि गरिएको आरोप लगाइएको छ ।
निवेदनमा अग्रवालको मुख्य कम्पनी २०६७ सालमा नक्कली भ्याट बिल प्रकरणमा मुछिएको र हाल उक्त कम्पनी बन्द गरी सोही नामसँग मिल्दोजुल्दो अन्य कम्पनी स्थापना गरेर कारोबार सञ्चालन गरिएको दाबी गरिएको छ । उजुरीकर्ताले “मोरङ अटो वर्क्स” नामबाट प्रयोग गरिएका अक्षरहरू जोडेर “एमएडब्लु (MAW)” समूहअन्तर्गत विभिन्न कम्पनीमार्फत कारोबार भइरहेको उल्लेख गरेका छन् ।
बिज्ञापन
उजुरीमा २०६७ सालमा गठन गरिएको नक्कली मूल्य अभिवृद्धि कर छली सम्बन्धी छानबिन समितिको प्रतिवेदनमा समेत अग्रवाललाई दोषी किटान गरिएको दाबी गरिएको छ ।
त्यस्तै, आर्थिक वर्ष २०८०/०८१ मा एमएडब्लु वृद्धि कमर्शियल भेहिकल्स प्रा.लि. ले आयात गरेको फोटोन विद्युतीय गाडीमा भन्सार छली भएको आरोप पनि लगाइएको छ । भन्सार विभागले च.नं. ५६४/०८१–०८२ मार्फत करिब ६ करोड रुपैयाँ बराबरको भन्सार बक्यौता देखिएको भन्दै तत्काल राजस्व दाखिला गर्न पत्राचार गरेको भए पनि हालसम्म भुक्तानी नगरेको निवेदनमा उल्लेख छ ।
उजुरीकर्ताले अग्रवाल सम्बद्ध सबै कम्पनीहरूको २०६७ सालयताको भ्याट विवरण, पुष्टी नहुने खर्च तथा आयकरसम्बन्धी कारोबारको विस्तृत अनुसन्धान गर्न माग गरेका छन् । साथै, आफ्नै कम्पनीहरूबीच कृत्रिम कारोबार देखाएर कर छली गरिएको आशंका पनि व्यक्त गरिएको छ ।
उजुरीमा सम्बन्धित निकायमार्फत विस्तृत छानबिन गरी दोषी देखिए कडा कानुनी कारबाही गर्न माग गरिएको छ ।
