जनकपुरधाम — प्रतिनिधिसभा निर्वाचनको मौन अवधिकै बीच सरकारी सवारी साधनमा निजी नम्बर प्लेट जडान गरी सञ्चालन गरिएको आरोपमा मधेश प्रदेशका पूर्वसभामुख रामचन्द्र मण्डलका ज्वाइँ रमेश मण्डललाई सुरक्षा निकायले नियन्त्रणमा लिएको छ।
बिज्ञापन
सशस्त्र प्रहरीको विशेष चेकजाँच टोलीले मिथिला बिहारी नगरपालिका–पुरन्दाहा क्षेत्रबाट शंकास्पद अवस्थामा फेला परेको चारचक्के गाडी रोकेपछि कागजात जाँच गर्दा नम्बर प्लेट र दर्ता विवरणबीच असमानता भेटिएको जनाइएको छ। त्यसपछि चालकसहित रमेश मण्डललाई नियन्त्रणमा लिइएको हो।
बिज्ञापन
सशस्त्र प्रहरी बल, नेपाल मधेश प्रदेशका डिआइजी कृष्ण ढकालले एउटा गाडी र चालक नियन्त्रणमा लिएको पुष्टि गर्दै घटनाबारे थप अनुसन्धान भइरहेको बताए। “गाडी र चालक नियन्त्रणमा छन्, विस्तृत विवरण संकलनको काम भइरहेको छ,” उनले संक्षिप्त प्रतिक्रिया दिए। जिल्ला प्रशासन कार्यालय धनुषाका प्रमुख जिल्ला अधिकारी प्रेमप्रसाद लुइँटेलले पनि घटना भएको पुष्टि गरे तर अनुसन्धान प्रभावित नहोस् भन्दै थप विवरण खुलाउन चाहेनन्।
प्रारम्भिक जानकारीअनुसार नियन्त्रणमा लिइएको सवारी प्रदेश सभाको नाममा दर्ता भएको सरकारी गाडी हो। तर त्यसमा ‘बागमती–प्र–०१ ००३२ च ७८९४’ नम्बर अंकित निजी नम्बर प्लेट प्रयोग गरिएको भेटिएको स्रोतको दाबी छ। उक्त नम्बर प्लेट नक्कली हुन सक्ने आशंका गरिएको छ।
बिज्ञापन
चेकजाँचका क्रममा गाडीका आधिकारिक कागजात र प्रयोग गरिएको नम्बर प्लेटबीच मिलान नहुँदा शंका उत्पन्न भएको सुरक्षा स्रोतले जनाएको छ। गाडीबाट केही नगद रकमसमेत बरामद भएको चर्चा भए पनि त्यसबारे आधिकारिक पुष्टि भएको छैन।
निर्वाचन आचारसंहिताअनुसार मौन अवधिमा कुनै पनि प्रकारको प्रचार–प्रसार, मतदाता प्रभावित पार्ने गतिविधि वा शंकास्पद आर्थिक चलखेल निषेध हुन्छ। सुरक्षा निकायले मौन अवधिमा सवारी साधन, नगद ओसारपसार र राजनीतिक गतिविधिमाथि विशेष निगरानी बढाइरहेका बेला सरकारी गाडीमा निजी नम्बर प्लेट जडान भएको प्रकरण सार्वजनिक भएको हो।
सुरक्षा स्रोतका अनुसार गाडी मतदाता प्रभावित पार्ने उद्देश्यले प्रयोग गरिएको हुन सक्ने प्रारम्भिक आशंका गरिएको छ। यद्यपि यसबारे प्रमाण संकलन र बयान प्रक्रिया जारी रहेको जनाइएको छ।
रमेश मण्डल पूर्वसभामुख रामचन्द्र मण्डलका ज्वाइँ मात्र नभई उनका निजी सचिवसमेत रहेको बताइन्छ। रामचन्द्र मण्डल यसअघि प्रदेश सभाबाट पदमुक्त भएपछि धनुषा–१ बाट नेपाल कम्युनिष्ट पार्टी (एमाले)को तर्फबाट प्रतिनिधिसभा सदस्यका उम्मेदवार बनेका छन्।
उम्मेदवारसँग निकट सम्बन्ध भएका व्यक्तिको नाम जोडिएपछि घटनाले राजनीतिक वृत्तमा चासो र बहस बढाएको छ। प्रतिपक्षी दलहरूले निष्पक्ष छानबिनको माग गरेका छन् भने एमाले निकट स्रोतहरूले अनुसन्धान तथ्यका आधारमा अघि बढ्नुपर्ने बताएका छन्।
नियन्त्रणमा लिइएको गाडी र सम्बन्धित व्यक्तिलाई थप अनुसन्धानका लागि इलाका प्रहरी कार्यालय धनुषाधाममा बुझाइएको छ। प्रहरीले गाडीको वास्तविक दर्ता, नम्बर प्लेटको वैधता, बरामद नगदको स्रोत र सम्भावित उद्देश्यबारे अनुसन्धान गरिरहेको जनाएको छ।
यदि सरकारी सवारीको दुरुपयोग वा नक्कली नम्बर प्लेट प्रयोग भएको पुष्टि भए सम्बन्धित व्यक्तिविरुद्ध सरकारी सम्पत्ति दुरुपयोग, जालसाजी तथा निर्वाचन आचारसंहिता उल्लंघनअन्तर्गत कानुनी प्रक्रिया अघि बढ्न सक्ने देखिन्छ।
मौन अवधिमै सार्वजनिक भएको यो घटनाले मधेश प्रदेशको चुनावी वातावरण थप संवेदनशील बनाएको छ। अब अनुसन्धानको निष्कर्षले यो सामान्य त्रुटि हो वा योजनाबद्ध अनियमितता, त्यसको वास्तविकता उजागर गर्नेछ।
