आगामी ११ फागुनमा हुने प्रतिनिधि सभाको निर्वाचन गर्ने अभिभारा ११ जना महिला कर्मचारीको काँधमा रहेको छ ।  गृह मन्त्रालयको कर्मचारी प्रशासन महाशाखाको उपसचिव मीना अर्यालका अनुसार अहिले सुदुरपश्चिमको एक,कर्णाली प्रदेशको १,लुम्बिनी प्रदेशको २,कोशी प्रदेशका ४,बागमती प्रदेशमा १,गण्डकी प्रदेशमा दुई गरी गरी कूल ११ जना महिलाहरुले जिल्ला प्रशासन कार्यालयको कमाण्ड गरिरहेका छन् ।

जस अनुसार,सुदुरपश्चिम प्रदेशको डोटी जिल्लाको प्रमुख जिल्ला अधिकारीमा कल्पना नेपाल,कर्णाली प्रदेशको डा ।डोल्पा जिल्लाको प्रमुख जिल्ला अधिकारी जुनु हमाल ढकाल,  लुम्बिनी प्रदेशको रुकुम पूर्व सीता परियार, र पाल्पा जिल्लाको प्रमुख जिल्ला अधिकारीमा विनु बज्राचार्य प्रमुख जिल्ला अधिकारीको भूमिकामा रहेका छन् ।

यस्तै,कोशी प्रदेशका खोटाङ जिल्लाको सिडियोको कुर्सीमा रेखा कँडेल,संखुवासभामा सृजना थपलिया,तेह्रथुम बन्दना राई,सोलुखुम्बु लीला केसी पाण्डेले ती जिल्लाका प्रशासन कार्यालयको नेतृत्व गरिरहँदा बाग्मती प्रदेशको सिन्धुली स्किम श्रेष्ठ,गण्डकी प्रदेशको मुस्ताङ  जिल्लाको कमाण्ड अजिता शर्मा र कास्की जिल्ला प्रशासनको नेतृत्व रुद्रादेवी शर्माले गरिरहेकी छिन् । जसमध्ये फष्ट क्लासका अफिसरहरु कास्कीमा रुद्रादेवी शर्मा, सिन्धुली  स्किम श्रेष्ठ,खोटाङमा रेखा कँडेल र संखुवासभा हाँकिरहेकी सृजना थपलिया र पाल्पाको कमाण्ड गरिरहेकी विनु बज्राचार्य सहसचिव तहका कर्मचारी हुन ।  बाँकी ६ जिल्लाको नेतृत्व उपसचिव तहका महिला कर्मचारीहरुले गरिरहेका छन् ।

यसैबीच हिमाली जिल्ला मुस्ताङको प्रशासनिक र सुरक्षा दुबै नेतृत्व महिलाले गरिरहेका छन् । त्यहाँ प्रमुख जिल्ला अधिकारीको रुपमा अजिता शर्मा र जिल्ला प्रहरी कार्यालयकी प्रमुख, प्रहरी नायब उपरीक्षक (डीएसपी) छिरिङ किप्पा लामा रहेका छन् । प्रधानमन्त्री सुशीला कार्कीले मुस्ताङ महिलाले हाँकेको जिल्ला भन्दै उनीहरुको प्रंशशा समेत गरेकी छिन् ।