देशका ७ सय ५३ स्थानीय तहमध्ये कार्यसम्पादन मूल्यांकनमा अर्घाखाँचीको पाणिनि गाउँपालिका अब्बल ठहरिएको छ । सो पालिकाले ८३ दशमलव ८४ अंक प्राप्त गरी पहिलो स्थान हासिल गरेको हो,कार्यसम्पादन मूल्यांकनमा ।
बिज्ञापन
राष्ट्रिय प्राकृतिक स्रोत तथा वित्त आयोगले विभिन्न १७ वटा सूचकलाई आधार मानेर देशैभरका स्थानीय,प्रदेशहरुको कार्यसम्पादन मूल्यांकन गरेको थियो । आयोगले देशैभरका स्थानीय तहको मूल्यांकन गर्दा १० असारभित्र बजेट सार्वजनिक गरे वा नगरेको, असार मसान्तभित्र बजेट पास गरे तथा नगरेको,घरजग्गा रजिस्ट्रेसन शुल्क, मनोरञ्जन कर तथा विज्ञापन करबापत उठेको रकमध्ये प्रदेश सरकारलाई दिनुपर्ने ४० प्रतिशत रकम मासिक प्रदेश सञ्चित कोषमा दाखिला गरेरनगरेको, राजस्व परिचालन, बजेट खर्च अवस्था, बेरुजु, सूत्र सफ्टवेयर प्रयोग, विद्यार्थी भर्ना दर, कक्षा ९ मा विद्यार्थी टिकाउ दर, गर्भ जाँच गर्ने महिला अनुपात, एसईई परीक्षा नतिजा, खोप लगाएका बालबालिकाको अनुपातलाई समेत आयोगले मूल्यांकनका आधार मानेको छ ।
बिज्ञापन
सोही आधारमा ८३ दशमलव ८४ अंक सहित अर्घाखाँचीको पाणिनि गाउँपालिका सबैभन्दा अग्रस्थानमा रहेको हो । यस्तै कार्यसम्पादनमा ८० कटाउने पालिका जम्मा चार वटा रहेका छन् । जसमा रुकुमश्चिमको चौरजहारी नगरपालिकाले ८२ दशमलव १५ अंक ल्याएर दोस्रो स्थानमा रहँदा गुल्मीको मालिका गाउँपालिकाले ८१ दशमलव ९८ प्रतिशत र धुर्कोट गाउँपालिकाले ८० दशमलव ५२ प्रतिशत अंक ल्याएर उत्कृष्ट गाउँपालिकाको सूचीमा अगाडि छन् ।
यसैगरी सोलुखुम्बुको सोलुदुधकुण्ड नगरपालिकाले ७८ दशमलव ५० अङ्क प्राप्त गरी पाँचौँ स्थान हासिल गरेको छ भने स्याङ्जाको कालीगण्डकी गाउँपालिका ७८ दशमलव १९ अङ्कका साथ छैटौँ स्थानमा परेको छ । मोरङको विराटनगर महानगरपालिका ७८ दशमलव ११ अङ्क सहित सूचीको सातौँ स्थानमा रहँदा डडेलधुराको अमरगढी नगरपालिकाले ७७ दशमलव ७९ अङ्क प्राप्त गरी आठौँ स्थान प्राप्त गरेको छ ।
बिज्ञापन
यस्तै,उत्कृष्ट १० को सूचीमा दाङको राप्ती गाउँपालिका ७७ दशमलव ४६ अङ्कका साथ नवौँ स्थानमा अटाउन सफल भएको छ भने जाजरकोटको भेरीमालिका नगरपालिका ७६ दशमलव ९६ अङ्क प्राप्त गर्दै दशौँ स्थानमा परेको आयोगले जनाएको छ । प्रतिवेदन अनुसार,सबैभन्दा कमजोर कार्यसम्पादन भएका पालिकाहरुमा मधेशका स्थानीय तहहरु रहेका छन् । जसमा धनुषाको धनौजी गाउँपालिकाले ३१ दशमलव ८१ अंक प्राप्त गर्दा देवाही गोनाही नगरपालिकाले ३० दशमलव ९१ अंक पाएको छ भने पर्साको धोबिनी गाउँपालिकाले ३२ दशमलव ८८ अंक पाएको वित्त आयोगको रिर्पोटमा उल्लेख छ ।
