बिज्ञापन

बिज्ञापन

सूचनामा मिति २०८२ फागुन १ गते विमानस्थल र आसपासको क्षेत्रमा विभिन्न समूह तथा राजनीतिक दलले प्रदर्शन, भेला तथा र्‍याली गर्ने भनी सार्वजनिक गरेका विज्ञप्ति र सामाजिक सञ्जालमा प्रसारित सामग्रीप्रति प्रशासनको गम्भीर ध्यानाकर्षण भएको उल्लेख छ। स्थानीय प्रशासन ऐन, २०२८ बमोजिम यस्ता कार्यक्रमका लागि पूर्व स्वीकृति नलिइएको तथा निर्वाचन आचारसंहिता लागू भइसकेको अवस्थामा यस प्रकृतिका गतिविधि गर्न बन्देज रहेको प्रशासनको भनाइ छ।

प्रशासनले विमानस्थल प्रवेश गर्ने गोल्डेन गेटदेखि विमानस्थल परिसरभित्रका सम्पूर्ण सडक, आन्तरिक तथा अन्तर्राष्ट्रिय टर्मिनल क्षेत्र, पार्किङ क्षेत्रलगायत हाताभित्रका सबै क्षेत्रमा निषेध आदेश लागू हुने जनाएको छ। यात्रुको सहज आवागमन, सार्वजनिक यातायात सञ्चालन तथा शान्ति–सुरक्षामा असर पर्न सक्ने सम्भावनालाई ध्यानमा राख्दै यस्तो निर्णय गरिएको सूचनामा उल्लेख छ।

निषेधित क्षेत्रमा कानूनविपरीत गतिविधि गर्ने जोसुकैलाई प्रचलित कानूनबमोजिम कारबाही गरिने चेतावनी पनि प्रशासनले दिएको छ।

यद्यपि निषेध आदेश जारी गरिएका क्षेत्रबाहेकका स्थानमा भने संविधानले प्रत्याभूत गरेको विचार तथा अभिव्यक्तिको स्वतन्त्रता र बिना हातहतियार शान्तिपूर्ण रूपमा भेला भई विरोध गर्ने अधिकारप्रति स्थानीय प्रशासन प्रतिबद्ध रहेको स्पष्ट पारिएको छ। तर पूर्व जानकारीबिना गरिएका कार्यक्रम वा सार्वजनिक तथा निजी सम्पत्तिमा क्षति पुर्‍याएमा स्थानीय प्रशासन ऐन, २०२८ तथा सम्बन्धित कार्यविधि, २०८१ अनुसार क्षतिको मूल्यांकन गरी आयोजकबाटै क्षतिपूर्ति असुल गरिने जनाइएको छ।