जिल्ला प्रशासन कार्यालय काठमाडौंले नेकपा (एमाले)ले भोलि गर्ने भनिएको प्रदर्शनका लागि स्वीकृति नदिने भएको छ ।
बिज्ञापन
नेकपा एमालेको भ्रातृ संगठन राष्ट्रिय युवा संघले काठमाडौंमा गर्न लागेको मोटरसाइकल र्यालीलाई प्रशासनले रोक लगाएको हो । जिल्ला प्रशासन कार्यालय काठमाडौंले आज एक अत्यन्त जरुरी सूचना जारी गर्दै कुनै पनि समूह वा संगठनले पूर्व स्वीकृतिविना र्याली, जुलुस, धर्ना, सभा वा प्रदर्शन गर्न नपाउने उल्लेख गरेको हो ।
बिज्ञापन
प्रमुख जिल्ला अधिकारी ईश्वरराज पौडेलले सुरक्षा जोखिम बढ्ने भएकाले कुनै पनि समूहलाई प्रदर्शनको अनुमति नदिने निर्णय भएको जानकारी दिएका हुन् । प्रशासनको सूचनामा कुनै निश्चित सूमह तोकिएको छैन । तर, फरकफरक समूहले भोलि काठमाडौंका विभिन्न स्थानमा मोटरसाइकल र्याली तथा सभा गर्ने सूचना प्राप्त भएको प्रशासनले जनाएको छ ।
‘मिति २०८२ असोज २५ गते शनिबारका दिन फरक–फरक समूहहरूले काठमाडौं जिल्लाका विभिन्न स्थानहरूमा मोटरसाइकल लिएर सभा गर्ने भनी सूचना प्राप्त भएको छ । भाद्र २३ गतेको ‘GenZ आन्दोलनपछि भएको तोडफोड, आगजनी तथा सार्वजनिक र निजी सम्पत्तिमा क्षति पुगेको यहाँहरू सबैलाई विदितै छ । शान्ति सुरक्षाको स्थिति कायम राख्ने, सार्वजनिक सम्पत्तिको संरक्षण गर्ने र सेवा प्रवाह सहज बनाउने कार्यहरू शुरू भएका छन् । यस्तो अवस्थामा विभिन्न समूहबाट हुने भनिएका र्याली, जुलुस र प्रदर्शनहरूले सुरक्षा चुनौती बढाउन सक्ने भएकाले कुनै पनि यस्ता कार्यक्रम गर्न अनुमति नदिने निर्णय गरिएको छ ।’
बिज्ञापन
स्थानीय प्रशासन ऐन २०२८ को दफा ६ को उपदफा ३ को देहाय खण्ड (क) र प्रहरी ऐन २०१२ को दफा १९ बमोजिम प्रशासनले पूर्व स्वीकृति विना कार्यक्रम नगर्न/नगराउन प्रशासनले आग्रह गरेको छ ।
