बागमती प्रदेश सरकारले एउटा दरबन्दी कायम रहेको मन्त्रालयमा ३ जना सचिवको जिम्मेवारी तोकेको छ । मन्त्रालयको संख्या १४ बाट घटेर ८ मा सीमित भएसँगै एउटा दरबन्दी भएको मन्त्रालयमा ३ जना सचिवको जिम्मेवारी तोकेको छ,उनीहरुलाई क्षेत्रगत जिम्मेवारी दिएको हो ।

बिज्ञापन

८ मन्त्रालय रहेको प्रदेशमा हाल ५ जना सचिव बढी देखिएसँगै शुक्रबार बसेको प्रदेश सरकारको मन्त्रिपरिषद् बैठकले सचिवहरुको क्षेत्रगत जिम्मेवारी तोकेको हो । जस अनुसार आन्तरिक मामिला, कानुन तथा सहकारी मन्त्रालयको जिम्मेवारी महेश भट्टराईलाई दिइएको छ । उद्योग, वाणिज्य, पर्यटन, श्रम तथा यातायात मन्त्रालयअन्तर्गत जीवलाल भुसाललाई उद्योग तथा वाणिज्य क्षेत्र, अनिता निरौलालाई श्रम तथा यातायात क्षेत्र र दीपेन्द्र सुवेदीलाई संस्कृति तथा पर्यटन क्षेत्रको जिम्मेवारी तोकिएको छ । यस्तै,स्वास्थ्य तथा सामाजिक विकास मन्त्रालयअन्तर्गत गीताकुमारी होमेगाईंलाई युवा तथा खेलकुद क्षेत्र, डा सुमित्रा गौतमलाई स्वास्थ्य क्षेत्र र खुबिराम अधिकारीलाई सामाजिक क्षेत्रको जिम्मेवारी दिइएको छ ।
कृषि, पशुपन्छी, वन तथा वातावरण मन्त्रालयअन्तर्गत डा केदार बराललाई वन तथा वातावरण क्षेत्र र सुधिर श्रेष्ठलाई कृषि तथा पशुपन्छी क्षेत्रको जिम्मेवारी तोकिएको छ । मन्त्रालयको सङ्गठन तथा व्यवस्थापन सर्वेक्षणको कार्य सम्पन्न नभएसम्म कायम रहने बागमती प्रदेश सरकारले जनाएको छ ।