कर्णाली प्रदेश सरकारले प्रदेशभित्रका स्थानीय तहका प्रमुख प्रशासकीय अधिकृत खटन पटनको अधिकारी प्रदेश सरकारलाई दिन माग गरेको छ । हाल प्रदेशका प्रमुख सचिवदेखि स्थानीय तहका प्रमुख प्रशासकीय अधिकृतहरु संघीय सरकारले खटन पटन गर्दै आइरहेको छ । सोही व्यवस्था परिमार्जन गर्दै स्थानीय तहका प्रमुख प्रशासकीय अधिकृत खटन पटनको अधिकार प्रदेश सरकारलाई दिन माग गर्दै प्रदेश सरकारले संघीय मामिला तथा सामान्य प्रशासन मन्त्रालयलाई पत्राचार गर्ने निर्णय गरेको हो ।

बिज्ञापन

बिहीबार मुख्यमन्त्री यामलाल कँडेलको अध्यक्षतामा बसेको मन्त्रालयस्तरीय विकास समस्या समाधान समितिको बैठक ९ निर्णयमध्ये पहिलो निर्णयमा भनिएको छ,स्थानीय तहमा प्रमुख प्रशासकीय अधिकृत संघीय मामिला तथा सामान्य प्रशासन मन्त्रालयले सोझै खटाउँदै आएकोमा सो व्यवस्था परिमार्जन गरी संघीय मामिला तथा सामान्य प्रशासन मन्त्रालयले एकमुष्ट रूपमा स्थानीय तहका प्रमुख प्रशासकीय अधिकृत सम्बन्धित प्रदेशमा खटाउने र प्रदेशको मुख्यमन्त्री तथा मन्त्रिपरिषदको कार्यालयले रिक्त रहेको स्थानीय तहमा खटाउने व्यवस्था गर्न सङ्घीय मामिला तथा सामान्य प्रशासन मन्त्रालयमा पुनः पत्राचार गर्ने ।