बिज्ञापन

बिज्ञापन

अव कुनै नाटकीय घटनाक्रम नभए पूर्वप्रधानन्यायाधीश सुशीला कार्की अन्तरिम सरकारको प्रधानमन्त्री बन्ने पक्कापक्की छ । राष्ट्रपतिसहित जेनजी प्रतिनिधि र राजनीतिक दलका नेताहरुसहित गएराति अबेरसम्म चलेको सर्वपक्षीय बैठकमा कार्कीलाई प्रधानमन्त्री बनाउने विषयमा सहमाति जुटेको हो ।

सो सँगै आज बिहान फोनमार्फत नयाँ प्रधानमन्त्रीको स्वागतको तयारी थाल्न निर्देशन दिइएको हो । प्रतिनिधिसभा सदस्य नरहेको व्यक्तिलाई कसरी प्रधानमन्त्री नियुक्त गर्ने भन्ने विषयमा भने राष्ट्रपति पौडेल अझै कानुनविदसँग परामर्शमै छन् । वर्तमान संविधानअनुसार नै उनलाई प्रधानमन्त्री बनाउनेगरी सहमति जुटेपछि आउनसक्ने थप जटिलताका सम्बन्धमा आवश्यक छलफल गर्न शुक्रबार बिहान अर्को बैठक राखिएको राष्ट्रपति निकट सूत्रहरुले जनाएका छन् ।

भदौ २३ र २४ गते भएको जेनजी आन्दोलनका क्रममा व्यापक धनजनको क्षति भएपछि प्रधानमन्त्री केपी शर्मा ओलीले राजीनामा दिएका थिए । त्यसपछि स्थितिलाई सहजीकरण गर्न सुरक्षाको सम्पूर्ण कमाण्डको नेतृत्व नेपाली सेनाले लिएको छ भने सेनाले नै आवश्यक सहजीकरण गरिरहेको छ ।