कोशी प्रदेशका चार सचिवहरु एकै पटक सरुवामा परेका छन् । सरुवा परेका सचिवहरु सबै काँग्रेस मन्त्री रहेका मन्त्रालयका हुन । यस अघि कोशी सरकारले ‘पर्यटन वर्ष २०८२’ का लागि छुट्याएको १० करोड रूपैयाँको अपारदर्शी खर्चमा पर्यटन बन तथा वातावरण सचिव विशाल घिमिरे विवादमा मुछिएका हुन ।
बिज्ञापन
उक्त पर्यटन वर्ष समुद्घाटन गर्दा पाहुना राखिएका होटलबाट पर्यटन वन तथा वातावरण मन्त्रालयले खाली बिल ल्याएको र भुक्तानी गर्दा समेत कर्मचारीहरुले ३० प्रतिशत कमिसन लिएका होटल व्यवसायीहरुको आरोप छ । असार मसान्तसम्म भुक्तानी नगरेको र पछि व्यक्तिगत खाताबाट २ लाख ७६ हजार रुपैयाँ होटललाई बुझाएको विषय संसद्सम्म पुगेको थियो । सांसदहरूले यो रकम प्रदेश सरकारलाई दिएको चन्दा हो कि ऋण भन्ने प्रश्न नै उठाएका थिए । जीवन आचार्य मन्त्री हुँदा कोशी प्रदेशमा सचिवको रूपमा भित्रिएका उनी वन मन्त्रालयमा सरुवा भएका छन् ।
बिज्ञापन
यस्तै त्यहाँका भौतिक पूर्वाधार विकास मन्त्रालयका सचिव अशोक कुमार साहको संघीय शहरी मन्त्रालय, उद्योग–कृषि तथा सहकारी मन्त्रालयका सचिव डा शरणकुमार पाण्डेको संघीय कृषि तथा पशुपक्षी मन्त्रालयमा र स्वास्थ्य मन्त्रालयकी सचिव डा राधिका थपलियाको संघीय स्वास्थ्य तथा जनसंख्या मन्त्रालयमा सरुवा भएको हो । जस अनुसार पर्यटन मन्त्री त्यहाँ काग्रेसका सदानन्द मण्डल छन् भने खगेनसिं हाङगाम उद्योग मन्त्री छन् । काँग्रेसकै भुपेन्द्र राई भौतिक मन्त्री छन् ।
सो प्रदेशमा नयाँ सहर आयोजना (बबरमहल) का सहसचिव मिलन आचार्यलाई प्रदेशको भौतिक पूर्वाधार विकास मन्त्रालयमा र संघीय स्वास्थ्य तथा जनसंख्या मन्त्रालयका सहसचिव यदुचन्द्र घिमिरेलाई प्रदेशको स्वास्थ्य मन्त्रालयमा पुगेका छन् । विराटनगर महानगरपालिकाको प्रमुख प्रशासकीय अधिकृतमा भूमि व्यवस्था, सहकारी तथा गरिबी निवारण मन्त्रालयका योगेन्द्रप्रसाद दुलाललाई पठाइएको छ ।
