शिक्षा विज्ञान तथा प्रविधि मन्त्रालयले कर्मचारीलाई पदस्थापन, सरुवा तथा कामकाजमा खटाउन विभिन्न छ वटा सैद्धान्तिक आधार तयार पारेको छ । शिक्षामन्त्री विद्या भट्टराईले  मन्त्रीस्तरीय निर्णय गरेर मन्त्रालय र मातहतका निकायमा कार्यरत राजपत्राङ्कित द्वितीय श्रेणी र सोभन्दा मुनिका कर्मचारीको पदस्थापन, सरुवा तथा कामसम्बन्धी सैद्धान्तिक आधार तय गरेकी हुन ।
उनले कर्मचारीको पदस्थापन, सरुवा तथा कामकाज गर्न खटाउनेसम्बन्धी मापदण्ड, २०८० बमोजिम सरुवा, पदस्थापन गर्ने निर्णय गरेकीछिन् । जसअनुसार तल्लो पदमा पदाधिकार रही माथिल्लो पदको कुनै विशेष जिम्मेवारीमा रहेकाबाहेक एउटा निकायमा सामान्यतयाः दुई वर्षभन्दा बढी अवधि पुगेका कर्मचारीको सरुवा गरिनेछ ।

बिज्ञापन

त्यस्तै, अन्य निकायमा दरबन्दी रही मन्त्रालयमा खटिएका कर्मचारीलाई सम्भव भएसम्म जिल्लास्तरका कार्यालय, अन्य मन्त्रालय तथा निकायमा खटाइनेछ । शिक्षा मन्त्रालय वा मातहतबाहेक अन्य निकायमा सरुवा तथा कामकाज गर्न खटाउन वा त्यस्ता निकायबाट मन्त्रालयमा सरुवाका लागि संघीय मामिला तथा सामान्य प्रशासन मन्त्रालयमा सहमतिका लागि लेखी पठाउने पनि निर्णय गरिएको छ ।