भूमि व्यवस्थापन तथा अभिलेख विभागले एकै पटक ठूलो संख्यामा खरिदार, नायब सुब्बा र अधिकृतहरुको गुपचुप सरुवा गरेको छ । विभागले १७ साउनको मितिमा एकै पटक ७० भन्दा बढी खरिदार, नासु र अधिकृतहरुको सरुवा गरेको जनाइएको छ ।
बिज्ञापन
सरुवा गरिएकामध्ये अधिकांश काठमाडौं,ललितपुर,भक्तपुरका कार्यालयका रहेका छन् । एउटा कमाऊ कार्यालयबाट अर्काे कमाऊ कार्यालयमा कर्मचारीहरुको सरुवा गरिएको बताइएको छ । ऐन अनुसार असोजमा खरिदार र नासुहरुको सरुवा गर्ने व्यवस्था भए पनि दुई महिना अगाडि नै ठूलो संख्यामा खरिदार र नासु तहका कर्मचारीहरु चलाइएको हो ।
बिज्ञापन
साउन १५ सम्म निवेदन लिने, भदौं १५ अन्तरमन्त्रालय र विभागले भदौं पछि सरुवा गर्ने गरिदैं आएको भए पनि साउनको दोश्रो सातामै ठूलो संख्यामा खरिदार र नासु तहका कर्मचारीहरुको सरुवा गरिएको हो ।
यद्यपि भूमि व्यवस्था विभागले १५ जना कर्मचारीको पदस्थापन गरिएको र केही कर्मचारीको काज सरुवा गरेको जनाएको छ । यो बिषयमा विभागका महानिर्देशक कृष्णप्रसाद सापकोटासँग जिज्ञासा राख्दा विदेशीसँग मिटिङमा रहेको छु भन्दै प्रतिक्रिया दिनबाट पन्छिए ।
विभागले गरेको यो सरुवाको बिषयमा मन्त्रालयका सचिव,मन्त्रीसम्म बेखबर रहेका छन् ।
