पछिल्लो समय संसदीय सुनुवाई समिति कर्मकाण्डी बनेको आरोप लागिरहँदा निर्वाचन आयुक्तमा सिफारिस कृष्णमान प्रधानको नाम समितिले अस्वीकृत गर्ने निर्णय गरेको छ ।

सोमबार बसेको बैठकले प्रधानको नाम अस्वीकार गरेको हो।२ असारमा संवैधानिक परिषदको बैठकले प्रधानलाई निर्वाचन आयुक्तमा सिफारिस गरेको थियो । उजुरी आह्वान भएपछि संसदीय सुनुवाइ समितिमा प्रधानविरुद्ध यौन दुर्व्यवहारको उजुरी दर्ता भयो । १८ असारमा प्रधानविरुद्धका दर्ता भएका चारवटा उजुरी अध्ययनका लागि दुई दिनको समय दिएर समिति सदस्यलाई वितरण गरिएको थियो । संसदीय सुनुवाइका क्रममा एक महिलाले प्रधानले आफूलाई यौन शोषण गरेको उजुरी दिएकी थिइन् । प्रधानले कार्यालयमा इच्छाविपरीत यौनसम्पर्क राखेको,निरन्तर पाँच वर्षदेखि निरन्तर शोषण गरेको भन्दै एक महिलाले उजुरी दिएकी थिइन् । र, उक्त यौनकाण्डलाई प्रधानले १ करोड २५ लाख रुपैयाँ नगद दिएको प्रमाण पनि समितिमा पुगेको थियो ।
यो प्रकरणपछि समितिका सदस्यहरुलाई नैतिक दबाब परेको थियो ।