बाह्रै मास चल्दै आएको कर्मचारी सरुवाको धन्दा हाललाई स्थगन गरिएको छ । संघीय मामिला तथा सामान्य प्रशासन मन्त्रालयले हाललाई कर्मचारी सरुवा स्थगन गरिएको जनाएको छ ।

मन्त्रालय आफैले प्रचलित मान्यता र नियमलाई कुल्चिएर मनलाग्दी ढंगले सरुवा गर्दै आइरहेको थियो । पछिल्लो समय संघीय मामिला तथा सामान्य प्रशसन मन्त्री भानुभक्त जोशी छन् । सोझा मन्त्री जोशीको फाइदा उठाएर एकीकृत सरकारी कर्मचारी संगठनका नेताहरुले मनलाग्दी ढंगले कर्मचारी सरुवा गर्दै आइरहेका थिए । मन्त्रालयले गरिरहेको बेमौसमी सरुवाको कर्मचारी वृत्तबाटै आलोचना भइरहेको समयमा सामान्य प्रशासन मन्त्रालयले भने कर्मचारी सरुवासम्बन्धी प्रक्रिया स्थगन गरेको छ । संघीय मामिला तथा सामान्य प्रशासन मन्त्रालयले कर्मचारी सरुवालाई व्यवस्थित गर्न नयाँ मापदण्ड बनाउनुपर्ने भएकाले हाललाई सबै प्रक्रिया स्थगित गरेको जानकारी दिएको छ ।