सरकारले चालु आर्थिक बर्षमा भन्दा आगामी आर्थिक बर्षमा कर्मचारीको पारिश्रमिकता शीर्षकमा बजेट घटाएको भेटिएको छ । सरकारले आगामी बर्षका लागि कर्मचारीको पारिश्रमिक शीर्षकमा १ खर्ब २२ अर्ब ५४ करोड ३८ लाख रुपैयाँ विनियोजन गरेको छ । कर्मचारी र पदाधिकारीको पारिश्रमिक शीर्षकको चालु आर्थिक बर्षमा भन्दा आगामी आर्थिक बर्षमा घटाइएको हो । चालु आर्थिक बर्षमा १ खर्ब २४ अर्ब ९० करोड ५५ लाख रुपैयाँ बजेट छुट्टाइएको थियो । बजेटमा कर्मचारीको वैदेशिक भत्ता चालु आर्थिक बर्षभन्दा झण्डै २ करोडले घटाइएको छ । चालु आर्थिक बर्षमा यो शीर्षकमा ९१ करोड ७९ लाख छुट्टाइएको थियो । आगामी आर्थिक बर्षका लागि यही शीर्षकमा ८९ करोड ८७ लाख विनियोजन गरिएको छ । यस्तै स्थानीय भत्ता शीर्षकमा बजेट झण्डै ७० करोडले घटाइएको छ । स्थानीय भत्ता रकम चालु आर्थिक बर्षमा १ अर्ब ९३ करोड ३९ लाख छुट्टाइएकोमा आगामी आर्थिक बर्षका लागि १ अर्ब २० करोड ८८ लाख रुपैयाँमा झारिएको छ ।
बिज्ञापन
कर्मचारीको पारिश्रमिकता,स्थानीय भत्ता र वैदेशिक भ्रमण भत्ता शीर्षकमा कर्मचारीको बजेट घटे पनि सरकारले कर्मचारीका लागि प्रोत्साहन तथा पुरस्कार,मंहगी भत्ता,बैठक भत्ता,स्थानीय भत्ता,तालिम,फिल्ड भत्तामा भने चालु आर्थिक बर्षको भन्दा बढी रकम विनियोजन गरिएको भेटिएको छ । कर्मचारीको प्रोत्साहन तथा पुरस्कार शीर्षकमा मात्र झण्डै १५ करोड बढी रकम विनियोजन गरिएको छ । आगामी आर्थिक बर्षमा कर्मचारी प्रोत्साहन तथा पुरस्कार शीर्षकमा ५४ करोड ५ लाख रुपैयाँ छुट्याएको छ । चालु आर्थिक बर्षमा यो ३९ करोड २० लाख रुपैयाँ रहेको थियो । यो चालु आर्थिक बर्षको भन्दा १५ करोडले बढी हो ।
बिज्ञापन
यस्तै कर्मचारीको महंगी भत्ता पनि चालु आर्थिक बर्षभन्दा बढाइएको छ । चालु आर्थिक बर्षमा महँगी भत्ताको रकम ६ अर्ब ९५ करोड ५ लाख रहेकोमा आगामी आर्थिक बर्षका लागि यही शीर्षकमा ७ अर्ब १ करोड ५७ लाख बजेट छुट्टाइएको छ । यो चालु आर्थिक बर्षको भन्दा ६ करोड ५२ लाखले बढी विनियोजन गरिएको हो । यस्तै कर्मचारीको बैठक भत्ता चालु आर्थिक वर्षमा २२ करोड ५७ लाख रहेकामा आगामी वर्षका लागि २ करोड २२ लाख थपेर २४ करोड ७८ लाख रुपैयाँ छुट्टाइएको छ । यस्तै कर्मचारीको तालिम शीर्षकमा १ अर्ब ६२ करोड ३१ लाख बजेट विनियोजन भएको थियो । जुन अघिल्लो आर्थिक बर्षको भन्दा ३८ करोडले बढाइएको छ । अघिल्लो आर्थिक बर्षमा यही शीर्षकमा १ अर्ब २४ करोड ७५ लाख छुट्टाइएको छ ।
यस्तै अन्य भत्ता शीर्षकमा ११ करोड बढी बजेट विनियोजन गरिएको छ । चालु आर्थिक बर्षका लागि १ अर्ब ६८ करोड १६ लाख छुट्टाइएकोमा आगामी आवका लागि यही शीर्षकमा १ अर्ब ७७ करोड १२ लाख र फिल्ड भत्ता १ करोड २० लाखमा झण्डै २४ करोड रकम थपेर आगामी आर्थिक बर्षका लागि १ करोड ४४ लाख रुपैयाँ विनियोजन गरिएको छ । कर्मचारीको सामाजिक सुरक्षा शीर्षकको खर्च २ अर्ब ६२ करोड ६८ लाखबाट २ अर्ब ९५ करोड ९४ लाख रुपैयाँ पु¥याइएको छ।
बिज्ञापन
