भूमि व्यवस्थापन तथा अभिलेख विभागका महानिर्देशक कृष्ण प्रसाद सापकोटाले मनलाग्दी ढङ्गले कर्मचारी सरुवा गरेका छन् । उनले एकै पटक ठूलो संख्यामा खरिदार, नायब सुब्बा र अधिकृतहरुको गुपचुप सरुवा गरेको छ । १७ साउनको मितिमा एकै पटक ७० भन्दा बढी खरिदार, नासु र अधिकृतहरुको सरुवा गरेको जनाइएको छ ।
बिज्ञापन
सरुवा गरिएकामध्ये अधिकांश काठमाडौं,ललितपुर,भक्तपुरका कार्यालयका रहेका छन् । एउटा कमाऊ कार्यालयबाट अर्को कमाऊ कार्यालयमा कर्मचारीहरुको सरुवा गरिएको बताइएको छ । कर्मचारी प्रेसलाई प्राप्त विवरण अनुसार, अधिकृत भक्तबहादुर विष्ट ललितपुरबाट डिल्लीबजार मालपोतमा ल्याइएको छ भने दुर्गाबहादुर दाप डिल्लीबजार मालपोतबाट ललितपुर मालपोतमा खटाइएको छ । यी दुबै अधिकृत तहका कर्मचारी हुन । यस्तै २ जनाको पदस्थापनको काम समेत तमाम गरिएको छ । विभागले नासु कृष्णकुमार नेपाललाई डिल्लीबजारबाट भूमिसुधार तथा मालपोत कार्यालय भक्तपुरमा खटाएको छ भने शिक्षा मन्त्रालय अन्तर्गत कार्यरत रमेश भट्टराईलाई भूमि व्यवस्था मन्त्रालयमा सरुवा गरेको छ । यस्तै विभागमा कार्यरत नासु पवन भट्टराई भक्तपुर मालपोतमा खटाएको छ । ललितपुर मालपोतबाट डम्बर बहादुर कार्कीलाई भक्तपुर मालपोतमा पठाएको छ भक्तपुर मालपोतबाट विजयराम बनमालालाई मालपोत कार्यालय बर्दिबासमा खटाएको छ । यस्तै कलकी मालपोतबाट खरिदार रुद्र उप्रेती भक्तपुर मालपोतमा पुगेका छन् । मालपोत कार्यालय मोरङका कम्युटर अपरेटर गुणानन्द झा भक्तपुर मालपोतमा पुगेका छन् । यस्तै विभागमा कार्यरत खरदार अमर पुन भक्तपुर मालपोतमा भित्रिएका छन् ।
ऐन अनुसार असोजमा खरिदार र नासुहरुको सरुवा गर्ने व्यवस्था भए पनि दुई महिना अगाडि नै ठूलो संख्यामा खरिदार र नासु तहका कर्मचारीहरु चलाइएको हो । भूमि व्यवस्था विभागले १५ जना कर्मचारीको पदस्थापनमात्र गरिएको बताइरहँदा ठूला संख्याका खरिदार,नासु र अधिकृत तहका कर्मचारीहरुको काज सरुवा गरेको जनाएको छ ।
साउन १५ सम्म निवेदन लिने, भदौं १५ अन्तरमन्त्रालय र विभागले भदौं पछि सरुवा गर्ने गरिदैं आएको भए पनि साउनको दोश्रो सातामै ठूलो संख्यामा खरिदार र नासु तहका कर्मचारीहरुको सरुवा गरिएको हो । विभागले गरेको यो सरुवाको बिषयमा मन्त्रालयका सचिव,मन्त्रीसम्म बेखबर रहेका छन् । सचिव गोकर्णमणि दुवाडी सरुवा भएर हिड्ने समयमा विभागले ठूलो संख्यामा कर्मचारीहरुको काज सरुवा गरेको हो । १४ साउनमा मात्र मन्त्रिपरिषद्ले २१ जना सचिवहरुको सरुवा गरेको थियो । सो सरुवा हुँदा भूमि व्यवस्थाका सचिव गोकर्णमणि दुवाडी केन्द्रीय तथ्यांक विभागमा पुगेका थिए भने त्यहाँ तथ्यांक विभागबाट सचिव अर्जुन पोखरेललाई ल्याइएको थियो । यसरी सचिव सरुवा भएकै पर्सीपल्ट विभागले ठूलो संख्यामा खरिदार,नासु,अधिकृत तहका कर्मचारीको काज सरुवा तथा पदस्थापन गरेको हो । यो बिषयमा मन्त्रालय बेखबर छ ।
बिज्ञापन
