भ्रष्टाचारको आरोपमा निलम्बित मुख्य सचिव वैकुण्ठ अर्याल ५० हजार रुपैयाँ धरौटी तारेखमा रिहा भएका छन् । अख्तियारले मुद्धा लगेको ३५ दिनपछि बयानका लागि आज विशेष अदालतमा पुगेका पूर्वमुख्य सचिव डा वैकुण्ठ अर्याललाई विशेष अदालतले ५० हजार धरौटीमा रिहा गरेको हो ।

थुनछेक प्रयोजनका निम्ति आइतबार विशेष अदालत पुगेका अर्यालको बयान साकिएपछि भएको थुनछेक बहस भएको थियो । अर्यालको पक्षमा बहस गर्ने पूर्व मन्त्रीदेखि,पूर्व सचिवसम्म पुगेका थिए । अर्यालको पक्षमा थुनछेक बहस गर्न पूर्व कानुनमन्त्री गोविन्द बन्दी,पूर्व सचिव यादव कोइराला र कृष्णजीवि घिमिरेहरुले थुनछेक बहस गरेका थिए । बन्दी पेशाले कानुन व्यवसायी नै हुन । माधव कुमार नेपालको नातेदार उनी सोही कोटाबाट कानुनमन्त्री बनेका थिए,६ महिना । सचिव पदबाट अवकाशपछि यादव कोइराला वकालत पेशातिर मोडिएका छन् । नेपालको प्रशासनिक इतिहासमा सचिव तहबाट अवकाश पाएको व्यक्तिले वकालत पेशा अंगालेको यो विरलै घटना होला । उनलाई अहिले सर्वोच्च,विशेष र डिल्लीबजारमा तपशील फर्म सञ्चालन गरिरहेका कोइरालाका पाटर्नर छन् अधिवक्ता कृष्णजीवी घिमिरे, डा देवबहादुर बोहरा । हिजो विशेषमा थुनछेक बहस गर्न उत्रिएका कृष्णजीवि पूर्व सचिव हुन ।
थुनछेक बहस पछि विशेष अदालतका अध्यक्ष टेकनारायण कुँवर, न्यायाधीशहरू रामबहादुर थापा र रितेन्द्र थापाको इजलासले अर्यालको बयानपछि ५० हजार धरौटी माग गर्ने आदेश गरेको हो । उनी धरौटी बुझाएर रिहा भएका छन् ।