संघीय निजामती सेवा विद्येयक उपर छलफल अघि बढ्न सकेको छैन । गत २ असारमा राखिएको बैठक एनजीओले खाजा प्रायोजन गरिदिएका कारण भाँडिएको थियो । बल्लतल्ल संसदबाट राज्यवस्था तथा सुशासन समितिमा पुगेको उक्त विद्येयकको पहिलो छलफल नै भाँडिएपछिको अर्काे छलफल अझैं टुंगो लाग्न सकेको छैन ।
बिज्ञापन
‘जात फाल्नु गहतको झोल’मा भनेझैं रमिता देखाइदिए संसदीय समितिले । विगतमा सहसचिव इन्द्रविलास पौडेलले गरेझैं गल्ती दोह्रो¥याइदिँदा र खाजाका लागि एनजीओको मुख ताक्दा सांसदका अर्काे कर्मचारी अहिले बदनामी खेप्दैछन् । त्यसरी बदनामी खेप्ने हाकिम हुन,सहसचिव सुरजकुमार दुरा । दुरा रामहरि खतिवडा सभापति रहेको राज्यव्यवस्था तथा सुशासन समितिका सभापति समेत हुन ।
बिज्ञापन
यस अघि संसदकै सहसचिव इन्द्रविलास पौडेलले ३० प्याकेट लञ्च बक्सका लागि युनडिपीलाई गुहारेकै शैलीमा दुराले २ असारमा आयोजित राज्यव्यवस्था तथा सुशासन समितिको एउटा बैठकमा उपस्थित सांसदहरुलाई खाजा र खानाका लागि एनजीओ गुहार्दा अहिले आलोचना खेप्दैछन् । पौडेल राष्ट्रिय सभाको दिगो विकास तथा सुशासन समितिका सचिव रहँदा पौडेलले ३० प्याकेट खाजा (लञ्च बक्स) उपलब्ध गराइदिन युएनडिपीलाई पत्राचार गर्दा आलोचित हुनु परेको थियो । उही शैलीमा राज्यव्यवस्था तथा सुशासन समितिका सचिव सुरजकुमार दुराले खाजाका लागि एउटा एनजिओ गुहार्दा २ असारमा सिंहदरबारमा रौनक छायो । आठ बर्षदेखि अलपत्र संघीय निजामती सेवा ऐन घुमिफिरी संघीय संसदको राज्यव्यवस्था तथा सुशासन समितिमा पुगेको थियो ।
उक्त विद्येयकमाथि दफादार छलफल हुँदै थियो । समितिका सभापति रामहरि खतिवडाले पहिलो बैठकमा गृहमन्त्री रवि लामिछानेसहित विज्ञका रुपमा लोकसेवा आयोगका पूर्व अध्यक्ष उमेश मैनालीलाई आमन्त्रण गरेका थिए । बिहानै आठ बजे शुरु हुने उक्त छलफल कार्यक्रममा खाजाको व्यवस्था गरेको थियो एनएफपीपीडीले । यो १० बर्ष अगाडि स्थापना भएको एनजीओ हो । जनसंख्या र विकासका लागि सांसदहरुको राष्ट्रिय मञ्च नाम दिइएको यसको अहिलेको हर्ताकर्ता हुन दिलकुमारी रावल थापा (पार्वती) । यही एनजीओले खुवाएको खाजा र खानाको बिषयमा गलफत्ती हुँदा सभापति रामहरि खतिवडालाई पहिलो गाँसमै ढुङ्गा लाग्न पुगेको हो । २०१४ देखि २०१८ सम्म यो एनजीओको हर्ताकर्ता थिइन महालक्ष्मी उपाध्याय डीना,त्यस यता पार्वती यो संस्थाको प्रमुख छिन् ।
बिज्ञापन
आइतबारको बैठकमा मन्त्री,सांसददेखि विज्ञमध्ये आधा जतिले खाजा खाइसकेका थिए । अतिथीका रुपमा आमन्त्रित गृहमन्त्री रवि लामिछानेले चना, फलफुल, जाम–पाउरोटी, अण्डा, आलु भुजुरी आधा आधी खाइसकेका थिए । जसै त्यहाँ कांग्रेस सांसद हृदयराम थानी प्रवेश गरे अनि खाजा र खानाको स्पोन्सर खोज्न थाले । एनजीओको तर्फबाट अरनिका राई र राम गुरागाईंले आफ्नो परिचय दिए पछि कानुन बनाउने ठाउँमा एनजीओ घुसाइएको भन्दै गृहमन्त्री लामिछाने विच्किएर हिडे । केही सांसदहरु एनजीओले प्रायोजन गरेको खाजा खाइवरी निस्किए भने केही खाजा नखाइ उक्त बैठक बहिष्कार गरेर निस्किए । संघीय संसद सचिवालय स्रोतका अनुसार प्रत्येक समितिलाई बैठकका लागि १० लाखका दरले बजेट दिइदै आएको छ । तर सांसदहरुलाई खाजा खुवाउनका लागि संयुक्त राष्ट्रसंघीय जनसंख्या कोषसँग सहयोग लिएर सञ्चालन हुँदै आएको एनजीओलाई गुहारिएपछि सांसदहरु रामहरि खतिवडासँग रोश पोख्दै थिए ।
