पर्यटन विभागको महानिर्देशकमा  दुई रुद्र नाम गरेका सहसचिवको चर्चा चल्न थालेको छ । हालैमात्र त्यहाँका महानिर्देशक चक्रबहादुर बूढा प्रधानमन्त्री तथा मन्त्रिपरिषद् मातहतको कार्यालय राजश्व अनुसन्धान विभागको महानिर्देशक बन्न पुगेसँगै रिक्त हुन पुगेको महानिर्देशकको कुर्सीमा दुई रुद्रको चर्चा चल्न थालेको छ ।
गत माघमा मात्र अध्यागमनको महानिर्देशकको कुर्सीबाट निलम्बनमा परेका रुद्रमान सिंह तामाङ वा वालकुमारी घटना पछि गृहमा तानिएका रुद्र पण्डितमध्ये एकलाई लैजान लागिएको पर्यटन मन्त्रालय निकट स्रोतक दावी छ ।

रुद्र यस अघि पनि पर्यटन विभागको महानिर्देशक चलाइसकेका कर्मचारी हुन । जतिखेर उनी अध्यागमन विभागको महानिर्देशको कुर्सीमा थिए । त्यही समयमा अख्तियारले उनीविरुद्ध भ्रष्टाचार मुद्धा चलायो । मेलम्ची खानेपानी परियोजनामा भ्रष्टाचार भएको भन्दै अख्तियार दुरुपयोग अनुसन्धान आयोगले तामाङलाई समेत भ्रष्टाचार मुद्धा चलाएको थियो । काठमाडौँ महानगरपालिकाका प्रमुख कार्यकारी अधिकृत हुँदा मेलम्ची खानेपानी विकास समितिका सदस्य थिए । तामाङ हाल गृह मन्त्रालय मातहतको अध्यागमन विभागका महानिर्देशक छन् । उनीविरुद्ध ११ करोड ९ लाख १७ हजार रुपैयाँ बिगो मागदाबी गरेकोमा विशेष अदालतले उनलाई ५० हजार धरौटीमा छाड्न आदेश दिइसकेको छ ।