काठमाडौं । राष्ट्रिय किताबखानाले सरकारको नयाँ संगठन तथा पद दर्ता सम्बन्धी निर्णय कार्यान्वयनलाई तीव्रता दिएको छ। विशेष टास्क टिममार्फत शुक्रबार (श्रावण १५) सम्म १० मन्त्रालय तथा तिनअन्तर्गतका १२७ निकायको संगठन तथा पद दर्ता सम्पन्न भएको छ।
बिज्ञापन
नेपाल सरकार, मन्त्रिपरिषद्को २०८३ असार ३२ गतेको निर्णयअनुसार नयाँ संगठन तथा पद दर्ता गर्ने कार्य अघि बढाइएको हो। सोही निर्णय कार्यान्वयनका क्रममा हालसम्म कुल १३७ निकायबाट संगठन तथा पद दर्ताका लागि फाइल प्राप्त भएकोमा सबै फाइलको दर्ता प्रक्रिया सम्पन्न भएको राष्ट्रिय किताबखानाले जनाएको छ।
बिज्ञापन
किताबखानाका अनुसार हालसम्म विशिष्ट श्रेणीका १० पद, सहसचिव वा सो सरहका ८१ पदसहित कुल ४ हजार ६८२ पद तथा दरबन्दी दर्ता भइसकेको छ।
सरकारले मन्त्रालय तथा मातहतका निकायहरूको संगठन संरचना पुनर्संरचना गर्ने, दरबन्दी व्यवस्थापनलाई व्यवस्थित बनाउने तथा प्रशासनिक प्रणालीलाई थप प्रभावकारी बनाउने उद्देश्यका साथ संगठन तथा पद दर्ताको कार्यलाई प्राथमिकताका साथ अघि बढाएको हो।
बिज्ञापन
राष्ट्रिय किताबखानाले बाँकी मन्त्रालय तथा निकायबाट प्राप्त हुने फाइलहरूको दर्ता प्रक्रिया पनि सोही गतिमा अघि बढाइने जनाएको छ।
