दशैँ सुरु भइसकेको माहोलमै सिरहा नगरपालिकाले अस्थायी र करार सेवामा कार्यरत कर्मचारीलाई जागिरबाट हटाउने निर्णय गरेको छ। नगरपालिकाले आइतबार सूचना जारी गर्दै सोमबारदेखि लागू हुने गरी सबै अस्थायी, करार, ज्यालादारीलगायतका नियुक्ति र सम्झौता खारेज गरेको हो।

बिज्ञापन

नगर प्रमुख प्रशासकीय अधिकृत पुरुषोत्तम घिमिरेले संघीय सरकारको हालैको मन्त्रिपरिषद् निर्णय र त्यसपछि आएका परिपत्रको आधारमा यो कदम चालिएको जानकारी दिएका छन्। असोज ५ गते बसेको मन्त्रिपरिषद्को बैठकले संघ, प्रदेश र स्थानीय तहमा स्वीकृत दरबन्दीबाहेक अस्थायी वा करारमा कर्मचारी राख्न नपाइने निर्णय गरेको थियो। सो निर्णयअनुसार अर्थ मन्त्रालय (असोज ७ गते) र संघीय मामिला तथा सामान्य प्रशासन मन्त्रालय (असोज ८ गते) ले परिपत्र जारी गरी सबै तहका सरकारलाई करार तथा अस्थायी सम्झौता खारेज गर्न निर्देशन दिएका थिए।