काठमाडौँ सडक डिभिजनमा नयाँ नेतृत्वसँगै व्यापक सुधारका संकेत देखिएका छन्। भदौ ३० गते पदभार ग्रहण गरेका डिभिजन इन्जिनियर सुबोध कुमार देवकोटाले पदबहालीको पहिलो दिनमै ठूला निर्णय सार्वजनिक गर्दै कार्यालयलाई सुधार, जवाफदेहिता र पारदर्शितातर्फ मोड्ने प्रयास थालेका छन्।
बिज्ञापन
ज्यालादारी कर्मचारी हटाउने साहसिक निर्णय
बिज्ञापन
विगतका वर्षहरूमा सडक डिभिजन कार्यालयहरू राजनीतिक आसेपासे, दल–कार्यकर्ता र आफन्तहरूको भर्ती केन्द्र बनेको आलोचना हुँदै आएको छ। त्यही प्रवृत्तिलाई चुनौती दिंदै देवकोटाले काठमाडौँमा कार्यरत ५० जना ज्यालादारी कर्मचारीलाई असोज १ गतेदेखि बिदा गर्ने निर्णय गरेका छन्। यो कदमलाई अनावश्यक खर्च कटौती र कार्यकुशलताप्रति स्पष्ट सन्देशको रूपमा हेरिएको छ।
खाल्डोमुक्त काठमाडौँ अभियान
बिज्ञापन
पदभार ग्रहणसँगै देवकोटाले उपत्यकाका सडक खाल्डो–खुल्डीमुक्त बनाउने घोषणा गरे। तत्कालै खाल्डा–खुल्डीको विवरण तयार गर्न निर्देशन दिँदै बिहान–बेलुकाको समयमा प्राविधिक टोली खटाएर निरन्तर मर्मत गर्ने व्यवस्था गरेका छन्। साथै, नागरिकको गुनासो प्रत्यक्ष सुन्न छुट्टै हेल्पलाइन संचालन गर्ने र प्राप्त सूचना २४ घण्टाभित्र समाधान गर्ने प्रणाली सुरु गर्ने योजना सार्वजनिक गरेका छन्।
खर्च नियन्त्रण र पारदर्शिता
कार्यालयमा तेल, मसलन्द र ज्यालादारी कर्मचारीतर्फ मासिक ५० लाखभन्दा बढी खर्च हुने देखिएको भन्दै उनले ५० प्रतिशत खर्च कटौती गर्ने निर्णय गरेका छन्। यसबाट वार्षिक करिब तीन करोड रुपैयाँ जोगिने अनुमान गरिएको छ। अनावश्यक सवारीसाधन प्रयोगमा पनि नियन्त्रण गर्ने व्यवस्था गर्न लागिएको छ।
ट्राफिक सुरक्षा र गुणस्तरप्रति प्रतिबद्धता
सडक डिभिजन प्रमुख देवकोटाले ट्राफिक सुरक्षालाई प्राथमिकता दिने घोषणा गर्दै जेब्रा क्रसिङ, रोड मार्किङ र ट्राफिक लाइट मर्मतका लागि तत्काल टेन्डर प्रक्रिया अघि बढाउने बताए।
त्यस्तै, निर्माण कार्यको गुणस्तर सुनिश्चित गर्न अबदेखि प्राविधिक परीक्षण आफ्नै कार्यालय, सडक विभागको केन्द्रीय प्रयोगशाला वा पुल्चोक इन्जिनियरिङ क्याम्पसमार्फत मात्र गर्ने व्यवस्था मिलाइने उल्लेख गरे। यसलाई “ठेकेदारलाई सजिलो हुने पुरानो प्रवृत्तिको अन्त्य” को संकेतका रूपमा व्याख्या गरिएको छ।
सुधारका संकेत
देवकोटाको पहिलो दिनमै आएका यी कठोर निर्णयलाई “राजनीतिक भागबन्डा, आसेपासे र अनुत्पादक खर्चको घेराबाट सडक डिभिजनलाई बाहिर निकाल्ने प्रयास” का रूपमा लिइएको छ।
समग्रमा, देवकोटाले ल्याएका निर्णयहरूले काठमाडौँ सडक डिभिजनमा शुद्धिकरणको सुरुवात गरेका छन् भन्ने सन्देश दिन्छ। खर्च नियन्त्रण, पारदर्शिता, जनउत्तरदायित्व र गुणस्तरप्रतिको प्रतिबद्धता व्यवहारमै सफल भए, काठमाडौँको सडक व्यवस्थापनमा लामो समयदेखि जरा गाडेको अस्वस्थ अभ्यास अन्त्य हुने अपेक्षा गरिएको छ।
डिभिजन इन्जिनियर सुबोध कुमार देवकोटा सुधारवादी इन्जिनियरका रूपमा परिचित छन्। जुन जुन कार्यालयमा उनी पुगेका छन्, त्यहाँ आफ्नो छाप छोड्दै सुधारको बाटो खोल्ने छविसहित चिनिन्छन्।
