सत्ता र शक्तिमा जो पुगे पनि के लाग्छ र ? व्यापारी र विचौलियाहरु यति बलशाली छन कि तिनले कर्मचारी र प्रशासनलाई प्रभावमा पारेर अखाद्य बस्तु बजारमा विक्री वितरण गरिरहेका छन् । अहिले खाद्य प्रविधि तथा गुण नियन्त्रण विभागमा मतिना वैद्य छिन् । उनी सो विभागको रैथाने डिजी हुन । काँग्रेस,एमाले,माओवादीको सत्तामा तर मारेर सोही विभाग हाक्न सफल उनी रास्वपाको सरकार हुँदा समेत सोही विभागको डिजी छिन् । यस्तै उपभोक्ता हित तथा संरक्षण विभागको महानिर्देशक छन्,मोतिराम सापकोटा । यस्का अलवा बजारमा दर्जनौं उपभोक्तावादी संघ संस्थाहरु छन् । ती कसैको आँखा परेको छैन बजारमा खुलेआम विक्री वितरण भइरहेको एक अखाद्य पेय पर्दाथमा ।

बिज्ञापन

पछिल्लो दिनमा एक्सट्रिम इनर्जी ड्रिग्सका नाममा एउटा मन्द बिषयको व्यापार फष्टाइरहेको छ । विगतमा रेडबुलकै शैलीमा अहिले एग्रो थाई फूड्स प्रा. लि. को ट्रेडमार्क मा उत्पादन गरिएको हानीकारक पेय पर्दाथ खुलेआम विक्री वितरण भइरहँदा समेत सरकारी निकाय मौन छन् । खाद्य विशेषज्ञहरुका अनुसार, एक्सट्रिम इनर्जी ड्रिग्समा टोरिन र क्याफिन मिसाएर तयार पारिएको हो । यी बस्तु पिउँदा शरीरमा नकारात्मक असर पर्न सक्छ । जसको सेवनबाट मुटुको धड्कन बढ्ने, रक्तचाप प्रभावित हुने, निद्रा नलाग्ने, चिन्ता बढ्ने, पेट दुख्ने, वाकवाकी लाग्नेजस्ता समस्या देखिन सक्ने भन्दै खाद्य तथा पोषणविद्हरुले सचेत रहन र यस्ता पेय पर्दाथ प्रयोग नगर्न भनेका छन् । क्याफिनको बढी प्रयोगले मानिसको दिमाग बोधो र भुत्ते हुने समस्या देखापर्ने हुँदा क्याफिन बढि प्रयोग नगर्न चिकित्सकहरुले सुझाउँछन् । क्याफिनको प्रयोगले एकाग्रता बढ्छ, थकान घट्छ र छोटो समयका लागि ऊर्जा महसुस हुने भए पनि शरीरमा यसको नकारात्मक प्रभाव पार्ने चिकित्सकहरु बताउँछन् । इनर्जी ड्रिग्स बच्चाहरुका लागि निषेध गरिएको छ । यस्का अलवा मधुमेह भएका व्यक्तिहरू, बालबालिकाहरू, गर्भवती वा स्तनपान गराउने महिलाहरू र क्याफिनप्रति संवेदनशील व्यक्तिहरुका लागि यो हानीकारक छ । यस्तै यस्को नियमित प्रयोगले गर्दा पेट दुख्ने, झाडापखाला लाग्ने, वाकवाकी आउने र अत्यधिक तिर्खा लाग्ने, दाँत बिग्रने, छालासम्बन्धी समस्या देखा पर्ने र अधिक चिनीका कारण डिप्रेसन पनि बढ्न सक्छ । बच्चा, किशोर किशोरीका साथै मोटोपन वा डायबिटिज भएका व्यक्तिका लागि यो अझ जोखिमपूर्ण हुन सक्ने विज्ञहरुले औल्याएका छन् ।