काठमाडौं । वैदेशिक रोजगारीका श्रमिकलाई दिइने अभिमुखीकरण तालिम अब राष्ट्रिय परिचयपत्र (एनआईडी) प्रणालीसँग जोडिएको छ ।
बिज्ञापन
विभागका अनुसार तालिम सञ्चालन गर्ने संस्थाहरूमा जडान गरिएका आईरिस प्रणालीमार्फत अभिलेख सीधै एनआईडीसँग लिंक गरिएको छ । यसपछि तालिम नलिई विदेशतर्फ प्रस्थान गर्ने प्रयास गर्ने श्रमिक तुरुन्तै पत्ता लाग्नेछन् ।
बिज्ञापन
विभागका महानिर्देशक कमल प्रसाद भट्टराईका भनाइअनुसार अबदेखि तालिममा भाग लिएका श्रमिकको उपस्थिति फिंगरप्रिन्ट र आइरिस डाटाबाट अनिवार्य प्रमाणीकरण हुनेछ । उनले भने, “अब आइरिस मात्र होइन, फिंगरप्रिन्ट मात्र होइन, पुरै बायोमेट्रिक डाटा नै अनिवार्य हुन्छ । अर्को कसैले गएर तालिम लिन दिने ठाउँ रहेन, त्यस्तो भए सिस्टमले तुरुन्तै देखाउँछ ।”
विभागले २०८१ असोज ११ गते सार्वजनिक सूचना जारी गरी सबै अभिमुखीकरण तालिम प्रदायक संस्थालाई फेस टाइम र आईरिस रिकग्नाइजेशन सिस्टम जडान गर्न निर्देशन दिएको थियो । त्यसपछि व्यवसायीहरूले आईरिस प्रणाली जडान गरे पनि, यसअघि एनआईडीसँग प्रत्यक्ष जोड्न नसक्दा तालिमको सत्यापनमा समस्या थियो ।
बिज्ञापन
एनआईडीसँगको एकीकृत प्रणाली लागू भएपछि तालिमका नाममा हुने ठगी, फर्जी उपस्थितिलगायत अनियमितता नियन्त्रण हुने अपेक्षा विभागले गरेको छ ।
यसरी वैदेशिक रोजगारी सम्बन्धी तालिम अब बायोमेट्रिक प्रमाणीकरणसहित थप व्यवस्थित र सुरक्षित बनेको विभागको दाबी छ ।
